Pynksan u Conrad ba wan iasoh NPP ki MLA ka Congress | Ym dei ba patan jubor ne pynbiej

Shillong, Nailar 07 : U Myntri Rangbah ka Jylla Conrad K Sangma ula pynksan ia ka jingwan pyn iasoh ki MLA ka Congress bad ka National People’s Party (NPP), haba kyntait ia ka jingkynnoh ba ka patan jubor bad pynbiej ia ki MLA.

Kat kum ka jingong jong u, ki MLA kila wan pyniasoh sha ka NPP ban pan ia ki lad pynroi na ka bynta ka constituency jong ki.

Haba kren sha ki lad pathai khubor ha ka sngi Palei, u Conrad ula ong ba kine ki MLA kila wan iakren hi ia u ban pan ia ki kam pynroi, ia kaba ula kular ba un shimkhia hakhmat eh.

Ula pynshai ba kam shym la don kano kano ka jingbuh kyndon haba iadei bad ka jingwan iasoh jong ki, haba ban jur ba ki kam pynroi bad ka jingtei ia ka jingshaniah ki dei ki mat ba kongsan eh jong ka party.

U Myntri Rangbah ula pynksan ia ka lynti pyniasoh, da kaba ong ba la leh ia ka kat kum ki kyndon jong ka Tenth Schedule ka Riti Synshar ka Ri.

“Baroh kine ki MLA kila wan haba bud ia ki kyndon bala buh bad dei namar kata u Lamphang ka Iingdorbar hadien ba iohi ia kine ki kyndon bad haba bun ia ka lynti kaba ki iaid, ula ai ia ka jingbit” ula ong.

“Phim pah ban ong ba tang namar ba ka jingpyniasoh ka jia ka dei kaba pynlong kam kai ia ka ain, em, ka ain ka ong ba phi lah ban leh hynrei phi don da ka lynti ban leh bad phim lah lada phim don ka lynti. Kumta, ka jingkylli ba long kamkai kam mih satia namar ka jingpyniasoh la leh kat kum ki kyndon ka Tenth Schedule bad kat kumki kyndon ka Anti-Defection Act” bynrap u Conrad.