Shillong, Nailar 07 : Ka khubor kaba sngewtynnad, ki paidbah mynta kila lah ban aplai ia ka jingbit ban tei Iing da kaba shu leh online, kaba pynkut syndon ia ka jingdonkam ban hap leit mih hi dalade sha Ophis, ka ban sdang treikam naduh ka 11 tarik Nailar.
Ia kane la pynbna da u Myntri Rangbah ka Jylla Conrad K Sangma hadien ba pyniaid ia ka jingialang jong ka Kynhun Myntri, kaba la ai jingmynjur ia ka second amendment jong ka Meghalaya Building Byelaws, 2025, kaba la wanrah da ka thmu ban pynbeit ryntih ia ka rukom ai ia ka Building Permission bad pynsuk ha ka jingialeh kam.
“Ngi la sdang pyntreikam mynta da ka Online Building Permission System. Da kane naduh ka 11 tarik Nailar, ki briew ba aplai jingbit ban tei iing, kila lah ban aplai online bad kim donkam shuh ban leit hi dalade sha Ophis” ong u Conrad haba iakren bad ki nongthoh khubor ha ka sngi Palei.
“Ka Technical Permission bad ka jingai jingmynjur kam donkam shuh na ka Meghalaya Urban Development Authority ia ki jingtei ki bym da don jingma than, kum ki iing briew, ki dukan bad ki karkhana kiba hapoh 2500 sqft lane ka iing mala G+1 bad 7 meter ka jingjrong ha ka jaka ba 3000 sq ft” ula ong.
Kat kum ka jingong jong u, ki Architect bad ki Engineer bala pynrung kyrteng (empanelled),la aibor ha ki ba kin ai ia ki jingbit ia ki jingtei kiba duna ka jingma.
“Phi lah ban aplai online ia ki jingbit bad lada dei ki jingtei kiba duna ki jingma, ki architect ne engineer bala pynrung kyrteng ha ka Sorkar, ki lah ban ai jingbit…phi lah ban aplai online bad phi lah ban sdang pyntrei ruh ia ka kam watla phim pat ioh ia ka jingbit bad hapoh ka 30 sngi, ia ka jingbit yn sa ai sha kine ki briew ba kin pyniaid shakhmat iaka kam”.
Ia ki jingtei kiba kham heh (G+2) u Conrad ula ong ba kan don ka Sorkar kan sat hung ia ka agency kum ka third party ka ban peit ia ka kam ai jingbit.
