Shillong, Nailar 07 : U Myntri Rangbah ka Jylla Conrad K Sangma dang shen ula iakren bad u Myntri kam Pohiing ka Ri Amit Shah halor ka kam ba iadei bad ka jinglong nongshongshnong bad ki kam Visa ba ktah ia uwei u Lyngdoh Niam ba nabar Ri, uba don ha Jylla.
Une u Lyngdoh Niam u dei u Phadar ha Nongstoin uba la aplai ban ioh long nongshongshnong, bad u Myntri Rangbah ka Jylla ula kyrpad ia u Amit Shah ban mynjur lem halor kane ka kam une u Lyngdoh Niam.
“U (Amit Shah) la kular ia nga ban ai noh da ka Visa ba im 10 snem sha une u Phadar khnang ba un ym donkam shuh ban pynthymmai manla u snem. Ula don kumba 80 snem eiei. Nga la pyntip ia kane sha u Archbishop bad ruh sha u ba un tip ba kane ka dei ka lynti ba u don bad kila kmen bha halor kane” ong u Conrad.
“Kane ka dei ka sienjam kaba sngewtynnad ba lada kum kane ka jingpynjlan ia ka Visa la ai haduh 5-10 snem, kan pynsuk bad pynaram bha ia ki” ula bynrap.
U Myntri Rangbah ula iakren ruh halor ka jingwan iuhkjat u Rector General (Global Head) ka Salesian sha ka Jylla.
U iathuh ba ki Salesian Sister kila kyrpad ia u ban pyntip lem sha ka MHA bad sha ka Ministry of External Affairs khnang ba kin lah ban wan rung khlem kano kano ka jingeh namar kila wan beit thik tang ia ki kam jong ka Salesian.
