Shillong, Nailar 07 : Ka Sorkar Jylla kala rai ban jied ia ka jaka ba 14 acre lyngba ka Meghalaya Infrastructure Development Finance Corporation (MIDC) ban shna ia ka project Slalom Course ha Wah Umtham, Ri-Bhoi District.
Kane ka project ka dei kaba thmu ban kyntiew ia ki kam ialehkai hapoh Wah, khamtam la Slalom, ka Conoeing bad Kayaking ha ki Wah ka Jylla.
“Kane kan dei ka ITS course ba tang kawei hapoh ka ri baroh kawei hadien bala pyndep pura ia ki jingtei ba donkam baroh” ong u Myntri Rangbah Conrad K Sangma haba iaren bad ki nongthoh khubor hadien ba dep pyniaid ia ka jingialang jong ka Kynhun Myntri ha ka sngi Palei.
“Ka don haduh 14 acre ka jaka ba kynthup ia kumba 8-9 acre ka jaka thungdieng ha ki lynti iaid, kaba wan lang kum ka song” ula ong haba pyntip ba ka Sorkar kan pynlut kumba T.21 klur ban thied ia kane ka jaka.
Ka Meghalaya ka dei kaba la paw bha ha ki kam ialehkai hapoh um bad kala jop haduh 5 tylli ki takma ha ka National Games.
“Namar kata, ngi angnud ban kyntiew ia kane bad ngi la rai ban shna ia ka slalom course ba pura ha Wah Umtham,Ri-Bhoi” ong u Conrad.
