Shillong, Nailar 05 : Ka kol kaba la wan ha ka kylla miet lyngba u Nasir Yasa kala pynthikna ia ka Malaysian Armed Force (ATM) FT ban khur ia ka jingjop pyrshah ia ka Rangdajied United FC (RUFC) da 1-0 kol ha ka jingiakhun kaba iakhaid bha jong ka Group F ka 134th Durand Cup, kaba la ialehkai ha madan Jawaharlal Nehru Stadium, Shillong ha ka sngi Ba-ar.
Watla ka Rangdajied kala ialehkai bha naduh ka jingioh bat ia ka bol haduh ka lad ban thep kol, hynrei ka dei ka kynhun ka Malaysia kaba la ioh ban pynkhih ia ka jar. U Nasir Yasa, ula ioh thep ia ka kol ha ka minit ba 67 da kaba ioh shut ia ka bol bala pynbuh da u Muhammad Arif, kaba rai ia ka jingjop iakane ka kynhun.
Ka Rangdajied kala ialehkai bha naduh kaba sdang bad ioh ruh ia ki lad ban thep kol tang hapoh ka 10 minit lyngba u Lawphinaw hynrei ia kane ka bol la ioh ban iada da u goalkeeper ka ATM u Anuar. Tang hadien atto katne por, u Balamlynti ula shut ia ka freekick sha ka Wadshwa Latoo ban plie ia ka lad thep kol hynrei kane ruh kala pulom. U Bantiplang Rymbai bad u Stephanson Pale ruh kila pyrshang ban tynjuh ia u nongap kol ka Malaysia hynrei ma ki ruh kim shym la lah satia ban pynkhih ia ka jar.
Hadien ka jingiakhaid ba khlem kol ha ka kylla step, ka Malaysian Armed Force kala wan sha ka kylla miet ban ialehkai kum ka kynhun bad kala pynkhlain ia ka rukom ialehkai ba shadien bad tur shakhmat tang haba iohlad. Ha ka minit ba 56, u Arif Aiman ula jan ioh thep ia ka kol da ka jingbakla jong u nongapkol ka Rangdajied hynrei da ka jingkloi u Denelson ban shut shabar ka kol ia ka bol, kala pynduhlad ia ka Malaysia ban pynkhih jar.
Khatduh dei ha ka minit ba 67, ki rang ialehkai ka Malaysia kila iohlad ban tur shakhmat bad da ka jingstad ban pyllait bol u Arif, u Nasir Yasa ula ioh ka lad ban thep ia ka kol.
Ka Rangdajied United FC kan iakynduh mynta sa ia ka Champion ka NorthEast United FC ha ka jingialehkai ba khatduh jong ka kynhun ha ka Group, ka ban long la 11 tarik Nailar.
 FT ban khur ia ka jingjop pyrshah ia ka Rangdajied United FC (RUFC) da 1-0 kol ha ka jingiakhun kaba iakhaid bha jong ka Group F ka 134th Durand Cup, kaba la ialehkai ha madan Jawaharlal Nehru Stadium, Shillong ha ka sngi Ba-ar.){kind=link}