Shillong Nailar 04: U Nongialam ka seng NPP bad Myntri Sorkar Marcuise N Marak ula pynpaw ia ka jingkyrmen kaba skhem ba ka seng National People’s Party (NPP) kala nang ioh ia ka jingkyrshan na ka bynta ka elekshon MDC jong ka Garo Hills Autonomous District Council (GHADC), kaban sa long ha u snem ban wan namar ba kala pyni ia ka jinglah ban treikam bha bad ka jingwanrah ia ki kam pynroi ha ka rilum Garo.
Haba kren shaphang ka jingpynkhreh jong ka seng, u Marak ula ong ba ka seng kala kiew shaphrang ha ka rilum Garo hapoh ka jingialam jong u Conrad K Sangma.
“Hapoh ka jingialam u Conrad K Sangma la leh bun ia kiei kiei ha rilum Garo nalor ia kaei kaba la leh ha kiwei pat ki bynta jong ka jylla. Kumta ki paidbah kin jied ia ka seng NPP namar ba kila iohi ia kitei ki kam ki jam kiba la jia hapoh rilum Garo. Kumta ki paidbah kin long na ka bynta ka NPP” ula ong haba iakren bad ki nongthoh khubor hynne ka sngi nyngkong.
Ula banjur ia ka jingdonkam ban jied ia ki kyrtong kiba kynsai, u nongialam ka NPP ula ong ba ka seng kan sa khmih bniah ha ka rukom jied ia ki kyrtong na ka bynta ka elekshon MDC, ban pynthikna ba kidei kiba lah ban shaniah bad kiba lah ban mihkhmat ia ka seng bad ia ki Nongrim ki jongka.
Ula pynthikna ba ka seng kan trei shitom ban pynkohnguh ia ki paidbah ba ka NPP kadei ka biang eh na ka bynta ka GHADC.
“Ki don bun ki mat kiba la mih ha ka district council hynrei ha ka jingialang jong ka seng, nga lah dep ban iakren halor kitei ki mat. Lada ngi donkam ban pynkhlain ia ka District Council ha Garo Hills ngi hap ban trei shitom bad ngi hap ban leit sha u paidbah ban pynkohnguh ia ki ba kane kadei ka seng kaba ki lah ban ai ka jingshaniah. Ngin pyrshang katba lah ban pynkhlain ia ka GHADC,” LA ONG U Marak.
Haba kylli la ka kynrum kynram kaba mih mynta ha GHADC kan ym ktah ia ka seng ha ka elekshon, u Working President ka NPP ka jylla ula kubur ba ka seng kan mad ia ka jingeh ha ka elekshon, khamtam eh ha ka jingeh kaba la pynmih da ki Executive Committee kiba rim.
Hynrei ula pynpaw pat ia ka jingskhem jingmut ba ka seng kan lah ban shimkhia ia kitei ki mat bad ban trei na ka bynta ban pynkhlain ia ka GHADC.
“Kumta, ki paidbah kila sngewtyhuh ia kitei ki mat bad ngin sa iakren bad ki paidbah halor katei ka bynta” la ong u Marak.
U Marak ula pyntip ba ka seng shen kan sa thaw noh ia ka Election Committee, kaban sa khmih ia ka jingjied ia ki kyrtong na ka bynta ka elekshon MDC.
Ula ong ba ka seng kala iaid shakhmat ha kaban pynkhreh ia ka elekshon, ha kaba la pynlong ia ki jingialang jong ka Regional Committee bad jongka District ban ithuh ia ki kyrtong kiba biang.
Ka NPP kala thaw ia ka Regional Committee kaba kynthup ia ki district president, secretary ryngkat bad ki president bad secretary jong ki shnad treikam ka seng.
Ka committee kan leh ia ka bynta kaba kongsan ban btin lynti ia ka seng ha ka jingiaid lynti na ka bynta ka elekshon bad ban jied ia ki kyrtong.
U Working President ula pyntip ba ka seng kala sdang ban ithuh ia ki kyrtong kiba biang bad uwei na ki kyrtong u Sengbath R Marak udei uba la shah jied da ka jingmynjur jong baroh ki nongkyrshan na ka Williamnagar constituency.
“Nga lah don ia ka jingialang ka jong nga ha Williamnagar constituency ha kaba ngi lah jied da kawei ka sur ban kyrshan ia ka jingtyrwa kaba la wanrah da u Block President u R Sangma, uba la tyrwa ia ka kyrteng jongu Sengbath R Marak. Baroh kila mynjur ia katei bad ngi ngin sa phah ia ka kyrteng ka jongu sha ki heh jong ka seng ban ai iaka tiket ba un iakhun na ka Williamnagar constituency,” ula ong bad ka bynrap ba kane ka sienjam ka long ruh kum ka nuksa ia kiwei pat ki constituency ba kin shimkhia noh ban rai kham kloi ia u kyrtong ka seng.
 kala nang ioh ia ka jingkyrshan na ka bynta ka elekshon MDC jong ka Garo Hills Autonomous District Council (GHADC), kaban sa long ha u snem ban wan namar ba kala pyni ia ka jinglah ban treikam bha bad ka jingwanrah ia ki kam pynroi ha ka rilum Garo.){kind=link}