Angnud u Bah Prestone ba baroh 60 ngut ki MLA ka Jylla kin dei ki dkhot ka NPP

Shillong Nailar 01: U President ka National People’s Party (NPP) Meghalaya bad u Symbud Myntri Rangbah ka Jylla u Bah Prestone Tynsong ula kyntait ia ka jingkynnoh ba ka seng kala donkti ha kaban pynbiej ne khroh ia ki MLA na kiwei pat ki seng, hadien ka jingwan pyniasoh u MLA ka Congress u Bah Ronnie V Lyngdoh sha ka NPP.

Haba iakren bad ki nongthoh khubor hynne ka sngi Thohdieng, u Bah Prestone ula ong, ba kadei ka rai jong u MLA ban pyniasoh bad ka NPP kaba la shah ialam namar ki mat kam pynroi kiba la leh da ka seng ban ia ka jingshah pynbiej da ka pisa.

“Kam dei stia namar ka pisa, kadei thik da kaba pynshong nongrim ia ki kam pynroi” ula ong bad ka bynrap ba u MLA ula iohi ia ka jingbat ka seng ia ka jingkular ia ka roi ka par bad ula shah pynbor ha ki paidbah ka constituency ban rung noh sha ka seng NPP.

Ula ong, ba ym dei u Bah Ronnie V Lyngdoh uba la jied ban rung sha ka NPP, hynrei kidei ki briew kiba kwah ba udei ban rung noh sha ka NPP.

“Peit ki lah don 3 ngut ki MLA ka Congress bad mynta biang sa uwei u MLA ka
Congress ula pyniasoh bad ka NPP. Hato phi tharai ba kine ki 4 ngut ki MLA Congress kiba la pyniasoh bad ka NPP kin ym iasyllok bad la ki nongialam bad ki paidbah na ka constituency kaba ki mihkhmat. Ki hap ban leh bad da kaba leh kumtei ka pyni shai kdar mynta ba ki paidbah ka jylla mynta ki jied ia ka NPP, ki kwah ban pyniasoh sha ka NPP bad kadei na ka daw jong kawei ka mat bad kata kadei ka roi ka par” la ong u Bah Prestone.

Ula ong ba ka seng ka don ruh ia ka polisi treikam, ba ka jingkhang jong ka seng ka plie ia kino kino ki nongmihkhmat kiba na kiwei pat ki seng ba kin wan ban pyniasoh bad ka NPP.

“Ngi don ia ka kamra kaba heh bad ka jingkhang ka dang plie. Lada baroh 60 ngut ki MLA ki pyniasoh bad ngi, katta nang bun katta nang bha” ong u Bah Prestone bad ka pynpaw ia ka jingthrang ba baroh 60 ngut ki MLA ha ka jylla kin long noh ki dkhot jong ka NPP.

“Kum u President ka NPP, ngi pdiang sngewbha ia baroh. Lada ngi don baroh 60 ngut, ngin dap da ka jingkmen. Sngewbha rung sha ka NPP. Haba phi rung, phi dei ban sngewthuh ia kawei, ba phi donkam ia ka roi ka par. Ngi don hangne ban ai ia ka roi ka par ha man la ka bynta jong ka jylla. Ngi don hangne ruh ban pdiang sngewbha ia ki nongmihkhmat kiba la shah jied kiba kwah ban pyniasoh bad ka NPP mynta ne lashai ne hynriew bnai ne shi snem shwa ban kut noh ka samoi treikam” ula ong.

U Bah Prestone Tynsong ula ai jingmut ia ka seng Congress ba kan phai bad khmih biang bad ban pynbha ia ka kam politik hapoh ka seng ka jongka bad ka pynpaw ba ka jingpulom ka seng ban bat ia la ki MLA kadei ka jingmih ka resol na ka jingdon hi ia la ki jingduna.

“Nga kwah ban ai jingmut ia ka seng Congress ba kan sngewbha ban khmih biang bad ban leh ia ka jingmaramot kaba tyngeh” ula ong.