Shillong, Nailar 01: Ka Meghalaya Pineapple Festival kaba 3 kaba la pynlong ha Dilli Haat, kala sdang hynne ka sngi Thohdieng ha kaba la pyninam ia ki soh bad ia ki marrep ka jylla Meghalaya bad la iasoi ruh ia lai tylli ki soskular ban wanrah ia ka jingkylla kiba pynpoi ia ki mar na ki jaka rep sha ki iew ki hat.
Ia kane ka Festival la plie da u Myntri ka Sorkar Pdeng uba khmih ia ka tnad Agriculture bad Rural Development u Shivraj Singh Chouhan ha ka jingdonlang u Myntri Rangbah ka jylla u Conrad K. Sangma, ha ba iaroh ba u sohtrun ka Meghalaya u dei shngiam bad uba thiang tam, kaba um pat ju ioh mad.
Ha ka jingpyrshang ban kyntiew ia ki nongrep, ka Sorkar Meghalaya kala iasoi iaka MoU bad ka Reliance Fresh, Amazon Karigar bad ka Blue Tokai Coffee Roasters ki ban thied, ban pyniar ia ka jingdon une u soh ha ki Nongbah ka ri bad ban pynkhkain ruh ia ka jingkhaii ia ki marrep kiba pynmih na ka jylla.
“Ki jingthung na Meghalaya la jan baroh hi kidei kiba khlem pyndonkam dawai. Mynta ka sngi, ka lyer ha Delhi kala dap da ka jingsma iwbih ka Meghalaya. Ngam lah shuh ban sangeh ia ka jingbam ia u sohtrun, ki long shisha kiba kyrpang” ong u Chouhan haba pynthikna ba ka sorkar pdeng kan iai bteng ban kyrshan ia ka jylla Meghalaya ha ka rep ka riang.
Ha kane ka Festival la sakhi ruh ia ka jingpyllait paidbah ia ka jingseisoh kaba thymmai ka jylla Meghalaya ha ka kam rep, kaba iaid ryngkat bad ka Vision@2032 ka jylla ban kynjoh sha ka $10 billion ka ioh ka kot.
Ki sienjam kiba kynthup ia ka jingpyniar ia ki karkhana, ban pynkhlain ia ka rukom kit bad jaka buh ia ki mar, ban kyntiew ia ka jingrep ia bunjait ki jingthung bad ban kyntiew ia ka ioh ka kot bad ia ka kamai kajih jong ki nongrep da kaba pyniaid iew ia ki marrep.
U Conrad Sangma ula pynpaw ba ka Meghalaya ka pynmih haduh 1.5 lakh metric ton u sohtrun man la ka snem ryngkat bad ka jingkiew ha ka jingkhaii shabar bad ka jingdawa hala ka jylla.
“Ha ki snem kiba la dep, ngi lah seng ia bun tylli ki Fruit Processing Unit ba kynjoh sha ki kyrdan ka pyrthei. Mynta da ka jingiasoi ia ka MoU, ki nongrep ki jong ngi kin ioh ia ka lad kaba donkam kata ban pynpoi ia ki marrep sha ki iew ki hat ha kaba kin ioh ruh ia ka jingkyrshan ha kaba iadei bad ka kit ka bah ia kine ki marrep” ong u Conrad Sangma.
Ha kine ki 3 snem kiba la dep, ka Meghalaya kala kiew sha ka jingdon sa 27 tylli ki Cold Storage, 8 tylli ki Processing Hub bad ka jingpyniasoh bad ki trok kiba don ia ki kor kiba pjah, kaba la pynsuk bad khaii pateng. Ha u snem 2024, ka jylla kala khaii 682 metric ton ia u sohtrun uba lah dep sain sha European Union, Gulf bad Southeast Asia, katba 150 MT la die ha ki nongbah jong ki jylla ha India lyngba ka jingiatreilang bad ki paralok.
Ha kane ka Festival kaba 3 sngi, la buh ia ki dukan jong ki kynhun ki nongrep, ka jingailad ban mad ia ki soh bad ka jingialang ban iakren marlhmat. Kan don ruh ka jingpyninam ia ka kolshor na ki nongrwai bad ki nongtem nongput kiba la ioh jongkyrshan na ka Chief Minister’s Meghalaya Grassroots Music Project bad kane kan long ha Dilli Haat bad India Gate.
Ia kane la pynlo g da ka Department of Agriculture & Farmers’ Welfare ka Sorkar Meghalaya, ka Pineapple Festival kala kylla long kum ka prokram ban kyntiew ia ka rukom rep tynrai bad ban buh ia ka thaon shatei lammihngi ha ka jaka kaba biang ha ka ioh ka kot jong ka ri ha ka liang ka rep ka riang.
Kane ka Festival ha Dilli Hat ka plie ia ki paidbah ban leit naduh ka por 11 baje my step haduh ka por 8:45 mynmiet bad kan kut ha ka 3 tarik u Nalar.
