Dibrugarh, Naitung 30: Ha shwa jong ka sngi ban rakhe ia ka Independence Day, ki bor pahara kila nang pynjur shuh shuh ia ka jingkhynra pyrshah ia ka kynhun ULFA-I.
Na ka liang jong ki bor pahara kila pynlong man ka por ia ka jingpeit bniah ban iada na kino kino ki jingjia pyntriem ha kylleng ki jaka ba kham long kongsan bad kumjuh ruh ha ki jaka paidbah hapoh ka nongbah.
Shuh shuh ki bor pahara kila peitngor bha bad kila pynlong ruh ia ka jingtalasi ba jur bha ha ki bynta jong ka Upper Assam ban khanglad na kino kino ki jingjia.
“Ki dkhot jong ka kynhun ULFA-I kila dep ban wan rung sha u pud u sam jong ka Assam bad ki dang rieh tngen ha ki bynta ba shngain jong ka thain.Ki don ia ka jingthmu ban pynbthei bom ha ki bynta jong ka Upper Assam bad ki dkhot kane ka kynhun kila wan rung tuh sha Assam lyngba ka khappud Arunachal” ong ka tyllong khubor.
“Ngi la nang pynjur ïa ka jingkhynra pyrshah ia ki kam pyntriem jong ki khlaw ULFA-I kiba la shah niew beain bad ngi la ia ki Naka ban talasi ia ki kali khnang ba ngin ioh kem ia ki ehrang bad ki briew kiba don jingiadei bad kane ka kynhun kaikhlaw” ong u SSP ka Dibrugarh u Rakesh Reddy.
U la ong, “Ngi la shim lut ia baroh ki lad ki lynti ban pyntikna bad ban khanglad ia kino kino ki jingjia kam pyntreim. Ngi la dep ban pyntip sha ki tnad syntiat bad kyntu ia ki paidbah ban ia kin ia trei lang bad ngi”.
Ki bor pahara ha Dibrugarh ki la peit pyrman bad husiar bha ha kum kine ki por na ka bynta ban khang lad ia ka jingthmu jong ka kynhun ULFA-I ban leh ia kino kino ki kam ba pynthut ia ka jingrakhe Independence Day.
