Dawa ka seng ki Nongrep ia ka Agriculture Policy thymmai | Sngewkhia ka Myntri ia ka jingeh ki nongrep

Shillong, Naitung 29: Ka Hill Farmers’ Union (HFU), ka kynhun kaba mihkhmat ia ki nongrep na kylleng ki bynta jong ka jylla Meghalaya, kala dawa ban thaw noh ia ka Agricultural Policy kaba thymmai, ka Subsidy ba kham bun, ka jingpynjlan ia ka aiom ban lum ia u synsar (kumba la kular mynshwa da u Myntri Rangbah) bad ban pyndonbynta lang ia ki nongrep ha ki kynhun ba thaw ia ki polisi treikam.

Ha ka jingiakynduh ba kham pher, ka Myntri ka rep ka riang Kong Ampareen Lyngdoh kala iakynduh ia ka kynhun ki nongialam kane ka seng ha Secretariat, ban iakren halor ki 10 tylli ki mat jingdawa kiba ktah ia ki nongrep ka jylla. Kane ka jingialang kala neh haduh 2 kynta, ia kaba ka Kong Ampareen kala iathuh ba ki jingiakren ki long kiba bniah bad sani bha.

Ka HFU, kala aiti ia ka dorkhas kaba la soi da u General Secretary uBah Allfonbirth Kharsyntiew bad ka jingdawa ka jongki ka kynthup ia ka jingsiew ia ka bai lutksan ia ki nongrep kiba shah pynjulor ki marrep ha ki bor mariang, ka jingbuh ia ka dor ka mur ki marrep ha ki iew ki hat, ka jingai jinghikai ban pyndonkam ia ki sboh, ka jingpyllait mardor ia ka jingsiew kaba dang sah ba hap ai sha ki nongrep bad ban don noh ia ka agricultural policy kaba thymmai.

Nalor kane kila tyrwa ban don noh ia ki District-Level Data Centre ha ka jing pynmih ia ki jingthung jingtep ban kyntiew ia ki lad ban die ha ki iew ki hat bad ban pynwandur ia ka policy treikam.

Hadienkane ka jingialang, ka Kong Ampareen Lyngdoh dalade hi kala leit sha State Central Library ban iakynduh ia ki dkhot ka HFU ki bym shim la iohlad ban rung shapoh ka Secretariat namar ka jingpynjari ia ka kyndon 144.

“Kum ka Myntri Sorkar, ngam lah ban pynshlur iano iano ruh ban pynkhein ia ka ain. Hynrei ngam lah pat ban kyntait ia ka jingshisha ba bun ki nongrep ki lah wan na ki jaka kiba jngai bha. Kumta nga la leit ban iakynduh ia ki ha ka jaka kaba ki ia ap” ong ka Kong Ampareen haba iakren bad ki nongthoh khubor.

Ka Kong Ampareen kala kubur ia ka jingsngewkhia jong ki nongrep ha ka jylla.

“Ka sorkar kam lah ban kyntait ia ka jingiam jong ki paidbah. Ka don ka rukom treikam ia kaba donkam ban pynbha shuh shuh ia ka. Ki nongrep ki lah kylli balei la siew rit bha iaki na ka bynta u sohsaw bad balei ka jingai jingkyrshan kam shym la poi ha ka por kaba biang sha ki. Nga lah ong ia ki, ki don ki kam kiba ngi lah ban leh noh mardor katba ki don pat kiwei ki kam kiba donkam ia ka jingiatreilang hapdeng ki kynhun bapher bapher”.

Kala pynshai ba ka Market Intervention Scheme ia mynta hi, ka khmih tang ia u phan bad ia u sohpul hapoh ki kyndon jong ka sorkar pdeng bad ka jingpyniar na ka bynta kiwei pat ki jingthung kan donkam ia ka jingiakren bad ka jingwanrah ia ka jingkylla hapoh ka rynsan jong ka ri. Ha kaba iadei bad ka jingdawa ban siew ia ka bai lutksan ia ki longiing jong u nongrep uba la shah pyniap ha ka shnong Lapangap namar ka jingiakynad ha ka thain khappud, kala banjur ba kane kadei ka jingjia hapdeng ki artylli ki jylla kaba dang sahteng ha ka jingtohkit jong ki pulit.

Ha kaba iadei bad ka jingdawa kaba kyrkieh kaba la pynpaw ba kala don ka jingshah ot ia ki marrep ne ‘Ot Kilo’ wat ha ki iew ki hat kiba la pyniaid da ka sorkar kum ka Mawiong, ka Kong Ampareen kala kubur ba kane ka hap hapoh u pud u sam jong ka District Council.
“Ngam lah ban tam ia u pud u jong nga” kala ong bad ka kyntu ia ki bor khmih kum ka District Council, Municipal Board bad ki bor pyniaid District ba kin iatreilang bad ka sorkar jylla.

Watla ia baroh ki jingdawa yn ym lah ban pynurlong noh mardor, ka jingialang kala long kum kawei na ki jingiakren hapdeng ka sorkar bad ki nongrep ha kine ki snem kiba bun ki nongrep kila pynpaw ia ka jingkyrmen hadien ba kila iohsngew ia ka jingpynshai.

“Ngim ap ban ioh ia ka jingsngewsynei” la ong uwei u nongrep uba ap ha Library, “Ngi dawa ia ka rukom treikam kaban yn ym pynpulom ia ngi”.