Shillong, Naitung 29: U nongialam ka BJP bad Myntri Sorkar Bah AL Hek, ha ka sngi Ba-ar u la pynpaw ia ka jingsngew shimet ba u ihun haba phai sha ka jingtrei kam jong ka sorkar MDA ia kaba la lam khmat da na National People Party (NPP).
Haba jubab ia ka jingkylli halor ka jingtreikam jong ka sorkar MDA, u bah Hek u la pashat sha ki paidbah ban bishar, da kaba ong ba ka dei ka kam jong ki paidbah ban bishar bniah ia ka jingtreikam jong ka sorkar.
U Bah Hek, u la pynpaw ka jingsngew shimet ba u ihun ha kaba iadei bad ki kam kiba la leh da kane ka sorkar, da kaba iaroh ba wat hapdeng ki jingeh bad ki jingduna ba ki ia kynduh.
“Ka dei ia ki paidbah ba kin ai ka jingbishar ym ma nga. Ki paidbah kin bishar. Kumno ngan bishar ia la ka jong kam ka jong nga. Kaei kaba ngi leh bad da ka mynsiem sngewrit jong nga, nga hi nga sngewhun. Ngi don shibun kiei kiei ban leh hynrei ngi don ruh ki jingduna,” ong u Bah Hek.
Ha kawei pat ka jingkylli, u Hek u la pynpaw ba ka rai ha kaba ïadei bad ka jingbteng hapoh ka kynhun myntri kan shong beit katkum ka rai jong ka party bad un ym lah ban kynthoh eiei halor kane ka bynta.
“Nga la dep ban ong ia phi ba kane kan shong ha ka rai jong ka party.Wat kylli ia nga ia kane.Phi lah ban kylli na ka party bad ba kane kadei ka rai jong ka party,” u la ong.
.){kind=link}