Tura Naitung 29: U Myntri Rangbah ka jylla u Conrad K Sangma hynne ka sngi Baar ula plie ia ki artylli ki Open Gym ha Tura, kaba don ha ka shnong Goanang bad ha Nehru Park.
Haba plie ia kine ki “Outdoor Open Gym”, ula ong ba kine ki jingtei kin ai jingmyntoi shibun ia ki paidbah jong ka sor Tura bad ula pyntip ruh ba yn sa buh sa 5 tylli ki Open Gym hapoh Tura.
U Myntri Rangbah ula ong ba yn buh ia ki Open Gym ha kylleng ki bynta jong ka jylla Meghalaya, ban plie lad ia ki paidbah ban ioh ia ka jingim kaba koit ba khiah.
Haba kren ha ka jingialang, ula pyntip ruh ba ka Tura Botanical Garden kaba don ha ka shnong Goanang yn shna pynbha da kaba tei ia ki jaka iaidkjat, ka jingiaid napdeng ki dieng kiba mih ha ka khalw ne canopy walk bad ka Cafeteria. Ka jinglut jingsep na ka bynta kane ka Projek ka long T.3.8 klur.
Ula ong ruh ba yn shna pynbha ia ka Nehru Park Tura da kaba buh ia ki jingtei ki bapher na ka bynta ban pynbyrngia bad ban pyndonbynta ia ki nongwankai da ki jingialehkai bad ki kam kiba bunjait.
Ha kane ka jingdon u Myntri Rangbah ha sor Tura, ula buh ruh ia u mawnongrim na ka bynta ban tei shuh shuh ia ki kamra skul jong ka Bidanchi Higher Secondary School. Ia kane ka jingtei la bei tyngka da ka Chief Minister’s Special Development kaba kot T.10 lak.
Ula aiti ruh ia ki shithi bhah tyngka sha ki kynhun bapher ha Tura kaba la kot ia ka T.80 Lak na ka bynta ki 12 tylli ki kynhun bad ki jaka pule.
Ha ka por mynsngi, u Myntri Rangbah ula leit ban jurip ia ka jingtei ia ka Indoor Stadium ha ka shnong Sunny Hills bad ula bthah ia ka tnad Sports ba kadei ban pynthikna ba dei ban tei pyndep hapoh u Nohprah mynta u snem bad ban pynlong ia ka jingiakob ialehkai kum ka Badminton.
Ia kane ka Indoor Stadium kadei kaba la phaikhmat ba dei ban shna pyndep khnang ba yn lah ban pynlong ia ka 39th National Games.
Ula pyntip ba ka sor Tura kan pynlong ruh ia ki katto katne ki jingiakob ialehkai ha ka National Games bad halor katei, ka sorkar kan pynshlur bad kyrshan ia ki Homestay kiba don 10 tylli ki kamra ha Tura, ha ka jaka ban shna ia ka Games Village.
Ula buh ruh ia u mawnongrim ban tei ia ka Skating Arena ha ka shnong Tetengkol ha Tura. Kane ka Skating Area kadei kaba la tei da ka Global Himalayan Expedition.
