Shillong, Naitung 26: Hapdeng ka jingsawa ka khubor bujli Myntri hapoh ka Sorkar MDA 2.0, ka HSPDP ka la pynthikna ba ka dang pyrkhat ban bujli Myntri Sorkar hapdeng ki 2 ngut ki nongthaw ain jong ka Party.
U President ka HSPDP u Bah KP Pangniang ula ong ba ka Party ka la sdang ïa ka jingïakren hapoh Party halor kane ka kam, kaba ai dak ba lah ban don ka jingkylla ha ka rukom mihkhmat Myntri jong ka hapoh ka Sorkar MDA 2.0.
Kumba ka long mynta ka HSPDP la phah da u Bah Shakliar Warjri uba bat ia ka tnat Sports hynrei ka jingpynbor hapoh ka Party ka lah ban pynlong iaka Party ban pynrung ia u nongthaw ain ba 3 jong ka, u Bah Methodius Dkhar ha ka kam Myntri Sorkar.
“Ngi dang iakren halor ka kam ban iasam ia ka shuki Myntri, ia ka rai kaba khatduh yn sa shim tang hadien ba la iamir jingmut bha bad baroh 3 ngut ki MLA jong ngi” la ong u Bah Pangniang.
U la pynshai ba ka Party kam pat rah ïa kane ka mat sha u Myntri Rangbah ka Jylla u Conrad K Sangma namar ka dang ap ïa ka jingïasngewthuh jingmut hapoh jong ka Party.
Kane ka jingpaw haka Party HSPDP ka long kaba kongsan namar baka Sorkar MDA ka la jan poi sha ka ar snem shiteng jong ka samoi treikam jong ka.
Katto katne ngut ki paralok ba ïatreilang—kynthup ïa ka NPP, BJP, UDP, bad HSPDP—la ngeit ba ki pynbor ban ïoh ïa ka bhah kaba kham heh ha ka bor synshar.
Katba ki nongialam ka MDA ki dang sngap jar, ka sur haba iadei bad ka jingpynkylla Myntri Sorkar ka la nang jur, ha kaba ki seng kum ka HSPDP mynta ki la pynpaw pyrthei ia lade na ka bynta ki jingkylla kiba lah ban mih ha ka rukom synshar.
