Pynlong workshop ka Ophis u Principal Accountant halor ka jingai NDC ban shim ram ki nongtrei sorkar

Shillong Naitung 25: Ka ophis jongu Principal Accountant General (A&E), Meghalaya, kala pynlong ia ka Workshop kaba shi sngi ha kaban pynbeit ryntih ia ka jingai ia ka No Demand Certificates (NDC) ia ki ram ne Loan na ka bynta ki nongtrei Sorkar.

Ia kane ka workshop la pynlong ha ka sngi Thohdieng ha Conference Hall jongka PAG, Shillong.

Ha kane ka jingialang la pynleit jingmut ha kaban pynduna ia ka por ha kaban ai ia ka NDC na ka bynta baroh ar kiba dang trei ha ka kam bad kiba la shongthait. Ka bynta kaba kongsan kadei ka jingpyniaid ha ka por kaba dei ia ki jingioh jingmyntoi kiba ioh ia ka pension. Ka jingpynslem ha kaban ai jingbit ia ka NDC bunsien ka ju ktah jur ia ka rukom pyllait ia ka pension bad kane ka sienjam ka thmu ban weng ia katei ka jingeh lyngba ka jingtreikam kaba don ka jingiatreilang bad da ka lynti kaba wanrah ia ka jingkylla.

Ha kane ka sngi la sakhi ia ka jingwan iashimbynta ki ophisar na ka ophis treikam ka PAG, Finance Department ka jylla bad ki Drawing bad Disbursing Officers (DDO) na ka tnad Agriculture. Ha ka jingialang kaba la don ka bynta ban iaphylliew jingmut kala long kaba seisoh ha kaba la sam ia ki jingtip ha kaba iadei bad ki jingeh kiba la mad bad ka rukom shim ia ki sienjam ban pynbeit ryntih ia ka NDC ha kylleng ki tnad bapher bapher.

La plie ia kane ka jingialang da u Deputy Accountant General (AE&VLC) ha kaba ula pynpaw ia ka bynta kaba kongsan jong ka NDC ha kaban pynbeit ia ka jingai ia ka pension bad ban pynkhlain ia baroh ki bor sorkar kiba peit ia ka pisa pilain ban pyntreikam ha ka lynti kaba biang tam kumba la pashat jingmut ha katei ka jingialang.

Kane ka sienjam, kadei ruh kaba la don ia ka jingkhmih lynti ba kan noh synniang shi katdei ban pynsted ia ka jingai ia ka NDC, ka jingsam ha ka por kaba biang ia ka pension bad ban pynkhlain ia bor ka sorkar jylla kiba khmih bad pyniaid ia ki kam pisa pilain.