Nongpoh, Naitung 22: U Deputy Commissioner ka Ri-Bhoi District, ha ka sngi Ba-ar, ula lum ia ka jingialang bad ka Meghalaya Commercial Trucks Owners & Drivers Association (MCTODA), halor ka jingkynnoh ba ki don haduh 16 tylli ki khyrdop lum khajna beain kiba don ha shilynter ka surok NH-6 ha Ri-Bhoi District.
Kine ki khyrdop ki kynthup ia ki check gate ne khyrdop talasi ka Khasi Hills Autonomous District Council (KHADC) bad ki khyrdop jong ki Syiem.
U President ka MCTODA Bah Mosklander Marngar ba ialam ia ka kynhun, ula pyntip ba u Deputy Commissioner ka Ri-Bhoi ula khot ia kane ka jingialang haba iohi lyngba ki lad pathai khubor, ia ka jingud jingnam jong ka Seng haba iadei bad ka jingmih ki khyrdop lum pisa beain hapoh NH-6 ha Ri-Bhoi.
U iathuh ba ki trok kit mar kiba iaid lyngba kine ki khyrdop ki hap ban siew hapdeng T.200 haduh T.500 ia kawei pa kawei ka khyrdop.
Ula kynthoh ba bun ki khyrdop ki dei jong ka KHADC bad ki Syiem kiba la pynieng ba kin long tang ki khyrdop talasi ne ki check gate, pynban ki nongpyniaid kila pynkylla ia ka check gate sha ka toll gate.
“Ka KHADC ka don ia ka hok ban pynieng khyrdop talasi kat kum ki ain jong ka khamtam ka ain Trading by Non Tribals, hynrei kane ki ain ki shah jop noh haba buh kongsan ia ka jingioh lum pisa ha ka jaka ban bat bad pynphai iaki pynkhein ain” ula kynthoh.
Haba kylli, u Bah Mosklander ula pyntip ba u Deputy Commissioner ula kular ban shimkhia ia kane ka mat haba tyrwa ruh ia ka jingiatreilang ban lah pynduh noh ia ki khyrdop kiba lum pisa beain hapoh ka District.
, halor ka jingkynnoh ba ki don haduh 16 tylli ki khyrdop lum khajna beain kiba don ha shilynter ka surok NH-6 ha Ri-Bhoi District.){kind=link}