Shillong, Naitung 21: U Aktor ba pawnam ka Bollywood Aamir Khan, la pyntip ba ula pynkhreh mynta ban shna ia ka phlim kaba pynshong nongrim na ka jingjia shah pyniap u Raja Raghuvanshi, u nong Indore ba wan leh honeymoon sha Sohra-ka kam bymman kaba la pynkyndit ia ka ri baroh kawei bad pynphai khmat ia ki ri ka pyrthei.
Ka khubor ba iajan bad u Aktor, ka pynpaw ba u Aamir Khan ula sdang ban lum ia ki jingtip kiba bniah halor kane ka jing jia bad dalade shimet, ula buddien ia kiei kiba jia ba man haduh mynta mynne.
La iathuh ba ula dep ruh ban pynlong ia ka jingiasyllok bad ki briew la jong haba iadei bad ka jingpynwandur ia ka khana bad ka lynti ban pyniaid ia kane ka project.
Watla kane ka project ka dang don tang ha ka jingthmu, ka jingiakren halor ki nongak bad ki jingdonkam baroh kala iaid shakhmat.
Hynrei, kam pat long shai pat la u Aamir Khan un ak hi dalade ha kane ka phlim lane shim ia ka bynta kum u nongpynmih ne producer. Ka jingpynbna paidbah halor kane ka project, la khmih lynti ba kan sa mih ha kine ki khyndiat bnai ban wan.
Lah ban kdew hangne, ka jingshah pyniap u Raja Raghuvanshi kala mih hakhmat duh ha man ki lad pathai khubor ka Ri haba une u nong Indore, ula jah rngai ha ka jingwan leh honeymoon sha Shillong, kaba la jia tang shiphew sngi hadien ba ka jingiathoh shong kurim bad ka Sonam Raghvanshi. Ki jingtohkit kiba la pynlong, kila sei madan ia ki jingjia kiba sngew ngiew, kaba la pynlong ia ka ban ioh ia ka jingphaikhmat jong ki lad pathai khubor na kylleng ka Ri.
Lada kane ka project ka iaid shakhmat, kan dei kawei pat ka phlim u Aamir Khan kaba iathuh khana ia ki jingjia ba shisha ha ka imlang sahlang.
