Shillong, Naitung 18 : Ka Hynniewtrep Youth Council (HYC) kala plie paidbah ia u mot ba shi rynieng jong u ‘Khla ka Wait’ ka Jaidbynriew, u Tirot Sing Syiem, uba la pynieng hapoh ka shnong Laitarted, Eastern West Khasi Hills.
Ia une u mot la plie paidbah ha ka sngi Palei, ha ka jingrakhe ia ka lyngkhuh sngi iap ba 190 snem jong une u Khla wait ka Ri. Ia une u mot la plie da u Dr K.M Syiemlieh, Syiem Khynnah ka Hima Nongkhlaw ha ka jingiadonlang u President ka HYC Bah Roy Kupar Synrem, ki nongialam barim bad ki dkhot na kylleng ka Ri-Khasi bad Jaintia.
Une u mot ba jrong 25 phut la pynieng halor u lum bala ai sngewbha da ka Dorbar Shnong Laitarted sha ka HYC. Ka seng ka kyrmen skhem ba une u mot un long kum ka dak ka jingialeh pyrshah bad ka jingpynkynmaw ia kane ka pateng ba mynta ba ka mynsiem iakhun jong u Tirot Sing Syiem kam dei ban iap noh ha kaban iada ban pynneh ia ka Jaidbynriew Hynniewtrep.
Hadien kane ka jingplie ia u mot, ka HYC kala pynlong ruh ia ka jingrakhe ia ka lyngkhuh 11 snem ba pynkha ia ka seng da kaba pynlong ia ki jinglehkmen bapher bapher kynthup ka jingrwai na ki kaitor ka Bri u Hynniewtrep kum u samla Wanjop Sohkhlet, Khmih Creative Society, Thunder’s Cave, Akbarlang Nongdhar bad ka kynhun tem Snowhite.
Nalor ane, ka Seng kala sam ruh ia ki khusnam sha ki samla kiba pass bha ha ki eksam class X bad class XII jong ki board bapher bapher. La air uh ia ka jingithuh ba kyrpang ia ka samla Rifiness Warjri, ka Samla ba khynnah tam ka Jylla ka ban pyndep ia ka jingkiew ia u lum Everest.
Haba kren ha ka jingialang, u President ka HYC ula ong ba une u mot un long kum ka jingpynkynmaw ia ka mynsiem ba shynrang bad ka jingaiti lut jong u Tirot Sing ban iada iala ka khyndew bad ki khun ki hajar.
“Ngi kwah ba ka Ri kan ai ka jaka kaba u dei hok ban ioh ha ki kot histori ba mynta. Ula iakhun ia ka hok jong ngi, ka snap ba kyrpang jong ngi, bad ia ka khyndew ka shyiap na ki bor ka Sorkar Bilat. Une u mot un dei u jingkynmaw burom jong ngi ia u Tirot Sing bad ia baroh ki riewshlyr ha ka ha ka jingialeh ki Khasi” ula ong.
Ula pynpaw ruh ba ka HYC kam long pyrshah ia ki kam pynroi hapoh ka Jylla hynrei ka kwah ba ka Sorkar Jylla kan pynbiang tarajur ia ka roi ka par bad ka jingiada ia ka Jaidbynriew.
 kala plie paidbah ia u mot ba shi rynieng jong u ‘Khla ka Wait’ ka Jaidbynriew, u Tirot Sing Syiem, uba la pynieng hapoh ka shnong Laitarted, Eastern West Khasi Hills.){kind=link}