Nongpoh, Naitung 15 : Ka ‘Eriong kala syllad naphang ia ki katto katne ki shnong kiba hap hapoh ka Umling Block ha ka sngi Nyngkong bad pynjulor klai ia ki jingthung jingthep bad ki Iing ki sem.
Ki Shnong kiba shah ktah jur eh eh ha kane ka eriong kaba wan iaid lynti, ki dei ka shnong Umdap Dumu bad ka Umdap Rngi.
Kane ka eriong kala wan syllad ha ka por 2 baje janmiet bad pynjulor ia kumba 20 tylli ki Iing nalor ka jingpynkhyllem bad jynrat ia ki diengkwai, ki lakait, ki post elektrik bad bun kiwei ki jingthung jingtep.
U Rangbah Shnong ka Umdap Rngi Bah Alexander Maring bad Rangbah Shnong ka Umdap Dumu Bah Angelius Maring, kila pynpaw ia ka jingsngewkhia halor ka jingjubor ka jingpynjulor jong kane ka eriong ia ka thain. Kila iathuh ba kane ka eriong kala ktah jur bha ia ki nongshongshnong bad kyntu ia ki bor Sorkar ba kin ai jingiarap mardor.
Kine ki Nongialam Shnong kila kyntu ia ki bor District ba kin phah ia ki Ophisar ba kin wan lum jingkhein ia ki jingjulor bad ban ai jingiarap bad ka bai lutksan ia ki longiing kiba shah ktah jur eh.
Kila iathuh ba ka jingshah ktah kaba jur eh ka dei ki nongrep namar kane ka eriong kala pynkhyllem lut ia ki diengkwai kiba la sdang ban sei soh, kaba ki nongrep kila ri bad sumar da bun bun snem ba un heh un sah ban sohbha. Nalor kane, ki ong ba ki nongrep diengkait ruh kila shah ktah bha nalor ki nongrep tympew, kaba la pynjaw ummat kthang ia ki.
Kat haduh mynta kam pat don satia ka jingpyllait khubor na ki bor Sorkar hynrei ki nongshongshnong kila kyrmen skhem ba ka Sorkar ban pynpoi noh kham kloi ia ki lad jingiarap.
