Pynrem ka MPHRC ba thombor ki pulit ia u samla hapoh thanad Sohra

Shillong Naitung 12: Ka Meghalaya Peoples Human Rights Council (MPHRC), kala pynrem jur ïa ka jingshah shoh shah bom u samla Getwin Jyrwa, 19 snem ka rta, na ka shnong Mawkisyiem ha ki pulit jong ka Sohra Police Station.

U Chairman ka MPHRC u Bah Dino D.G. Dympep ula pynpaw ba hadien ba ka Kong Mildred Jyrwa ka kmie jongu Getwin, kala leit ban ait hi ïa la u khun ha ka 3 tarik u Naitung ha thanad Sohra hynrei khlem ka jingmutdur pat kumba 5 ngut ki pulit kila donkti ban bom ban tied ïa u haduh ban da mynsaw jur.

Ula pynpaw ruh ba katkum ka ejahar kaba la ujor da u Rangbah Shnong ka Mawkisyiem ha ka 1 Naitung 2025 la kynnoh ia u Getwin Jyrwa ba ula thombor bad leh khlemakor ïa uwei u briew uba la tip kyrteng kum u Jop Majaw bad ki Pulit ka Sohra ki la registar case bad pynngat ïa une u samla ha ki kyndon ka Sohra Police P.S Case hapoh ki kyndoin 131/133/296 (a) jongka BNS.

Ka MPHRC kala ai ruh ka jingiaroh halor ka jingshah suspon u Sub-Inspector (SI) bad saw ngut ki pulit langrut, “Ngi ka ai jingïaroh ïa ka tnat pulit hapoh ka jingïalam jong u Superintendent of Police (SP) ka East Khasi Hills, Bah Vivek Syiem I.P.S kiba la sngewthuh shai ba kane ka kam thombor ka dei ka jingpynkhieñ bad ka jingïuhroit noh ïa ka hok longbriew manbriew bad dei ban pynshitom tyngeh ïa kita ki pulit langïong kiba la pynjah burom ïa ka tnat pulit baroh kawei” ong u Chairman ka MPHRC bad ka bynrap “Shisien haba don ki kam bymman kiba la leh ne pynkhieñ da kino kino ki pulit kiba long pyrshah ïa ka hok longbriew manbriew ïa kum kita ki kam bymman, kumta dei ki bor sorkar kiba hap ban shim mardor ïa ka jingkitkhlieh khnang bad ban ïada ïa uno uno u briew uba ngat ha kum kita ki jingshah thombor”.

Ka MPHRC kala pynapw ruh ba katkum ka kaiphod jong ka “Global Torture Index Report 2025, kaba la pyllait paidbah da ka Global Alliance of Anti Torture Organisation dang shen ha ka Dorbar kaba 59th jong ka UN Human Rights Council kaba long ha Geneva, Switzerland, la kdew shai ha ka kaiphod ba ka Ri India kadei kawei na ki Ri kaba jyllei bha ïa ki kam jingpynshitom bad ka jingthombor da ki bor pulit ha ki thanad bad kadei ka kam kaba ïai kynrei man la ka sngi.

U Bah Dympep ula ong ba ki bor sorkar kidei ban sngewthuh bad ban buh jingmut ba ki paid nongshong shnong ki don ïa la ka hok longbriew manbriew bad ki pulit kiba mlien ban leh ïa ki kam bymnan, dei ban pynshitom tyngeh ïa ki katkum ka aiñ.