Shillong Naitung 11: Ka Myntri ka Sorkar Pdeng kaba khmih ia ka Pla Tyngka ka Nirmala Sitharaman hynne ka sngi Palei kala sdang ia ka jingwan jngoh ia ka jylla Meghalaya kaba 4 sngi, bad iashimbynta ha ki prokram bapher bapher ha nongbah Shillong.
Ha kine ki jingialang la iadonlang u Myntri Rangbah ka jylla u Conrad K. Sangma, ka Myntri ka koit ka khiah ka Kong Ampareen Lyngdoh, u Chief Secretary ka jylla u Bah Donald Phillips Wahlang bad ka Secretary jongka Ministry of Corporate Affairs ka Deepti Gaur Mukerjee.
Ka Sitharaman kala pyniaid ia ka jingialang jongka North East Roundtable hapoh jong ka Prime Minister’s Internship Scheme (PMIS), kaba la iashimbynta da ki Intern ne ki samla kiba don hapdeng ka jingioh jinghikai, ki nongmihkhmat jong ki karkhana bad ki heh ophisar na ki tnad sorkar bapher bapher, ban khmih ia ka jinglong jingman bad ban ioh ia ki jingtip kiba paka ia ka jingpyniaid shakhmat ia kitei ki prokram kiba kongsan.
Ka PMIS kadei kaba don ia ka jingthmu ban weng ia ka jingduna hapdeng ka pule puthi bad ka iohkam iohjam da kaba pynbiang ia ka Internship kaba la pynwandur bha kaban long ka lad ia ki samla ha kylleng jong ka ri.
Ha katei ka jingialang, ki samla kiba leh Intern kiba na kylleng ki jylla jong ka thain shatei lammihngi kila pynpaw ia ka jingiaid lynti ka jongki, ka jingangnud bad ka jingwanrah ia ka jingkylla lyngba katei ka prokram.
U Khlainkupar Lyngkhoi uba na East Khasi Hills district, uba leh ia ka ‘Intern’ ha ka REC Limited, ula ong ba kane ka sienjam kala pynlong ia u ban long uba skhem jingmut halade bad ka jinghikai kaba ula ioh kan iarap shibun ia u ha kaban noh synniang da kaba don jingmut ha ka jaka trei.
“Kawei na ki sap kaba kongsan kaba nga lah ioh pdiang kadei ka jingbynta ia ka por. Nga la shimti ia kiba bun ki jingkitkhlieh ha ka jaka trei bad nga ai khublei ia ka Ministry bad ia ka sorkar na ka bynta kane ka scheme, kaban iarap bha ia ngi ha ki snem kiban wan” ula pynpaw.
Ula pynpaw ruh ia ka jingsngewnguh ia u Myntri Rangbahduh ka ri u Narendra Modi bad ia ka Myntri ka Sorkar Pdeng kaba khmih ia ka Pla Tyngka halor ka jingailad ia ki samla khamtam na ki jaka kiba na kyndong ban ioh ia ka jingmyntoi lyngba katei ka scheme.
Haba kren ha ka jingialang, ka Myntri ka Sorkar Pdeng kala banjur ia ka jingiohi jngai ne Vision jong katei ka scheme.
“Ka thong kaba hakhmat eh jong ka PMIS bad ka jingiohi jngai jong u Myntri Rangbahduh ka ri halor kane ka sienjam ka long ban kyrshan ia kito ki bym pat ju ioh ia ka jingbthah kam ne Assignment ne ka kam, kito kiba donkam ban ioh ia ka jingtbit bad ia ka lad ban pyni ia la ka jingshemphang. Kane ka prokram kadei ban iarap ia phi ban leit sha ka kompani kaba bha tam, ban pynshemphang ialade bad ka rukom trei ia ka kam bad ban ioh ia ka kabu kaba biang tam ban ioh ia ka kam ha ka jingim. Nga dap da ka jingkmen ban iohi ia phi baroh ba phin mih bad ban pyndonkam pura ia ka kabu kaba phi ioh” kala ong.
Ka Myntri Pla Tyngka kala ong ruh “Mynta ka sngi ka jia ryngkhat ruh ba kadei ka Guru Purnima, ka sngi kaba ngi kynmaw bad burom ia ki nonghikai ki jong ngi bad ia ki nongaibuit kiba tbit bad kiba shaniah ne Mentor. Na ka bynta na kiba bun na phi, ki nongaibuit kiba tbit bad kiba shaniah kiba phi iakynduh ha kitei ki kompani kin leh ia ka bynta kaba khraw ha ka jingim ka jong phi”.
Ka Sitharaman kala pynshlur ruh ia ki samla kiba leh Intern ban sdang ia la ki kam khaii pateng bad kala pynthikna ia ki ban ai ia ka jingbtin lynti bad ia ka jingkyrshan kaba pura na ka Ministry.
“Kiba la pyndep ia ka Internship, kiba lah ban don ia ka jingangnud ban seng kam hi kam dei satia kaba shu mutdur hynrei kane ka pyni ia ka jingthmu jong kane ka scheme ban iaid shakhmat. Ka sorkar bad ka Ministry of Corporate Affairs ki iengskhem ban pyniar ia kane ka sienjam. Nga kyntu ia phi baroh kiba leh Intern ba phin pyndep ia kane ka jingioh jinghikai bad ban iaid shaphrang ban long ki nongrah tiensyiem ne ‘Brand Ambassador’ jongka PMIS khnang ba kiwei pat ki samla kin lah ban ioh ia ka jingmyntoi.
