Dimapur, Naitung 8: Kumba lai tylli ki Relief Camp ne ki jaka sah ba shipor la dep ban buh ha BSNL Quarters kaba don ha Walford, S.M. Colony bad ha Namgalong Colony na ka bynta kito ki briew kiba la shah ktah na ka jingshlei um ha Dimapur, Nagaland.
Kumba la sakhi ba ka jylla Nagaland ka dang iai bteng ka jingther jong u slap ba jur bha bad ka Nagaland State Disaster Management Authority (NSDMA) kala pyntip ia ka jingjulor kaba jur bad kaba nang kiew ha kylleng ki katto katne ki district.
Ka Dimapur kadei kawei kaba la shah ktah bha namar ka jingiai bteng ban ther u slap ba khlem sangeh bad kiba jaka ba don ha them kila shlei um ia kaba la pynlong ia ki paidbah nong shong shnong ba ki hap ban leit sah sha ki jaka ai jingiarap ban rieh tngen shipor.
Ka State Disaster Response Force (SDRF) kala buh kawei ka lieng bad 25 ngut ki dkhot ba kynthup ruh ia kiba la shah hikai pyntbit bha ha ka liang jong ka jingngam um ban iarap ia ki briew kiba la sahkut ha ki iing ki sem bad kumjuh ruh ha ki surok.
Baroh kiba la shah ktah ki don haduh 844 ngut ki briew ba kynthup ia ki khynnah, ki rangbah kumjuh ruh ki briew kiba pang ba shitom bad ruh ki briew kiba donkam ka jingiarap lem bad ki khyllung la ioh ban pyllait im bad la ialam noh sha ki lai tylli ki Relief Camp.
Ha Dimapur district, ka jingshlei um kala poi ha ki shnong bapher bapher ba kynthup ia ka SM Colony, Ragailong, Namgalong, Super Market, K Sachu, ka shnong Ekhyoyan, Walford, bad ka Model Colony kaba don ha Purana Bazaar.
Ia ki Relief Camp la buh da ka District Disaster Management Authority (DDMA), Dimapur, na ka bynta kito ba shah pynkynriah katba ka kynhun HG, CD bad ka kynhun SDRF ki dang sah ban wad bad ban ioh pyllait ia kiba sahkut.
Kum kane hi kajuh jong ka jingshlei um, la ioh khubor ruh ha Chümoukedima district bad ki jaka ba shah ktah na kane ka jingshlei um ki kynthup ia ka Tenyiphe, Chekiye, Virazouma, Singrijan, Khopanala, Sovima bad ki shnong kiba don marjan bad ka 173rd CRPF Camp.
Kane ka jingiai bteng ban ther u slap kala pynjot ruh ia kiba bun ki jingtei bad ki jingshna jong ki briew ha kylleng ki jaka jong ka district.
