Dibrugarh, Naitung 7: Ha kawei ka case kaba la pynkydit shisha ia ki briew, kawei ka samla pule kaba dang pule ha ka klas 9 kala pynkut jubor ia la ka jong ka jingim ha u tyllai phasi, hadien ba la shah kynnoh ba kala shah leh khlem akor ha u wei na ki nonghikai ha Dhola kaba hap ha eastern Assam jong ka Tinsukia district.
Ki tyllong khubor ki iathuh ba kane ka khynnah kadei ba dang 14 snem ka rta bad kadei ruh ka khynnah jong ka Hatighuli High School.
Ka khynnah ka lah ban mad ïa ka jingshah lehbeiñ bad khlem akor ha u nonghikai jong ka haduh ba ka la pyrshang ban pynïap ïalade ha ka 3 tarik u Jylliew, 2025 mynshwa hynrei ki doctor, kumno re kumno ki la lah ban pynlait im ïa ka jingim jong ka. Hadien kata, u nonghikai u Vriku Chetry u la shah kem ha ki pulit ha ka 11 tarik Jylliew.
Hynrei, kane ka khynnah kala pynkut jubor noh ia la ka jong ka jingim da kaba sdien ha u tyllai phasi hynnin ka sngi hapoh ka iing sah jong ka.
Kane ka jingjia kala pynkhihwin ha kylleng ki jaka jong ka district ha kaba ki seng bapher bapher ki la dawa ia ka jingpynshitom kaba tyngeh bad kaba long ka nuksa ia u nonghikai ba shah kynnoh.
Shuh shuh ka tyllong khubor la iathuh ruh ba une u nonghikai ba shah kynnoh u ju ai ia kane ka khynnah da u dawai pynioh thiah ha shwa ban leh ia ka kam joh jait poh rati bad ia kane ka kam u la ju leh man ka por.
