Shillong, Naitung 06: Ka National People’s Youth Front (NPYF), Meghalaya State Unit ha ryngkat ka jingiatreilang bad ka NPYF Jowai Block kala pynkup burom ia ki samla pule ba wan sha khmat haka eksamin SSLC bad HSSLC 2025 kiba dei na Jowai Constituency.
Ia kane ka prokram pynkup burom la pynlong ha District Library Auditorium ha kaba u MLA ka Jowai uba dei ruh u State President ka NPYF Bah Wailadmiki Shylla u la long kum u Kongsan.
Ha ba kren ha kane ka sngi, u Bah Wailadmiki u la ban jur ba ka NPP ka don ki tnat bapher bapher kiba trei kyrpang na ka bynta ki samla, ki kynthei, ki nongrep bad kane ka prokram kam don jingiadei bad kano kano ka agenda me ka thong ban ialap elekshon.
U Bah Wailad u la ong ba ka prokram kadei ban ithuh ia ka jingtrei shitom jong ki samla pule namar ban ioh 80% ha ka Exam hi ka dei ka jingjop lypa.
U la pyntip ba ki samla pule kiba la shah pynkup burom ki dei kito kiba la ïoh 80% ha ka SSLC bad 70% ha ka HSSLC na ka bynta u snem 2025 bad u la ai khublei ruh ïa ki nonghikai bad ki kmie ki kpa kiba la ai ka jingshaniah bad jingkyrshan ha ki samla pule.
U Wailadmiki u la ai khublei ruh ïa ki nonghikai jong ka Jowai Government Girls Higher Secondary School kaba dang shu pynrung ïa ka Commerce stream ha HSSLC bad naduh ka Batch kaba nyngkong hi iwei i samla pule u la ïoh ïa ka Top Ten Position .
U la pyntip ruh ba shen ka NPYF kan sa plie noh ïa ka Students Cell ha Jowai Town ban ïarap ïa ki samla pule kiba na ki thaiñ nongkyndong ha ka Scholarship jong ki bad kiwei kiwei ki jingdonkam ba kongsan.
Nalor kane u MLA ka Jowai u ai khublei ruh ïa u Myntri Rangbah ka Jylla, u Conrad Sangma uba ha ka jingrakhe ïa ka Meghalaya Day Celebration ha Jowai ula pynbna ba ka Sorkar kan sdang ïa ka Nursing College ha Jowai ban ïarap ïa ki samla pule na kane ka thaiñ khnang ba kin nym donkam shuh ban leit pule nurse ha Shillong, Guwahati, Bangalore bad kiwei kiwei ki nongbah.
Kiwei kiba don bynta ha kane ka sngi pynkupburom iaki samla pule ki kynthup ki MDC, u president ka NPYF Jowai Unit u Bah Samehi Laloo, u Bah William E Pasweth u General Secretary jong ka NPYF West Jaiñtia Hills District, nalor kiwei kiwei.
Ha kane ka sngi, ka NYPF kala pynkupburom ia ki 137 ngut ki samla pule, ha kaba 74 ngut kidei kiba la leh bha ha ka SSLC bad 63 ngut ki la leh bha ha ka HSSLC.
, Meghalaya State Unit ha ryngkat ka jingiatreilang bad ka NPYF Jowai Block kala pynkup burom ia ki samla pule ba wan sha khmat haka eksamin SSLC bad HSSLC 2025 kiba dei na Jowai Constituency.){kind=link}