Shillong, Naitung 02: U Symbud Myntri Rangbah ka tnad Urban Affairs Bah Sniawbhalang Dhar ha ka sngi Balang ula pynpaw ba ka Sorkar ka khlem kyndang satia ia ki dukan madan hynrei kala ai ha ki ia kawei pat ka jaka shong dukan, kum ha MUDA Complex, kaba biangeh ban pyniiad ia ka kam khaii pateng.
Kat kum ka jingong u Bah Dhar, ka jinghiar khynra ka dei kaba la leh kat kum ka hukum jong ka Iingkashari bad ka jingthmu ka long ban buh ia ki nongshongdukan madan ha ki jaka bala ithuh.
Ka jingthmu jong ka jingoynkynriah ia ki dukan madan ka dei eh ban pynmyntoi ia ki bad ban wanrah ia ka jingkhuid jingsuba ka sor.
Haba kren sha ki nongthoh khubor, u Bah Dhar ula ong “Ka Sorkar kan leh la ka jong ka kam. Ngi la pynlong tang ia ka jingkhynra ban buh ia ki briew jong ngi ha ka jaka kaba dei. Kane ka long ruh kat kum ka hukum ka Iingkashari”.
“Nalor kata, baroh na ngi, ngi kwah ia ka sor jong ngi kaba khuid ba suba. Hooid, ngi hap ban burom ruh ia ki nongiaid nongieng bad ki briew ba pyndonkam lang ia ki surok bad lynti iaid” ula bynrap.
U DyCM ula ong ba ka Sorkar kala iakynduh ia ki nongshong dukan madan bad kala sngap ia ki jingkyrpad jong ngi ban bishar kynthup ka jingkwah jong ki ia ka jaka ka ban lah pyniaid iew ia ki mar ki mata.
“Kum ka Sorkar, ngi la pyrshang ban leh ha kata ka rukom ba ngin ym shu bret ia ki briew jong ngi. Ngi la ai ha ki ia ka jaka kaba biang eh ha MUDA Complex, kaba biang eh ban khaii. Kila kyrpad ia ngi ban buh ia ki ha ka jaka ka bym dei eh ka jaka pynlong iew. Ngi la pdiang ia kara bad ngi la leh a kaei kaba kila kyrpad”.
U Bah Dhar ula pynpaw ia ka jingsngewskhem ba ki nongshong dukan madan kin iatreilang bad ka Sorkar bad kyntiew noh sha ki jaka bala buh hapoh ka 22 tarik u Naitung.Hynrei, ula madan ba lada kim leh ia kata, ka ain kan shim iala ka jong ka lynti.
“Nga ngeit skhem ba kin iatreilang bad ka Sorkar bad lada kim iatreilang, ka ain kan shim iala ka jong ka lynti” ula ong haba ieng skhem ha ka nongrim ba ka Sorkar ka kut jingmut ban bud ia ka hukum jong ka Iingkashari.
Haba iadei bad ki nongshong dukan madan ki bym don ia ka Certificate of Vending, u Bah Dhar ula ong ba ka Sorkar kan sa leh eiei halor kane ka kam ha ki sngi ban sa wan.
U DyCM ula pynpaw ruh ba ka jingiakren bad ki nongshong dukan madan ka dei kaba dang iaid bad ki long kiba laitluid ban wan iakynduh ia ki Heh Sorkar lane ia u ban iakren ia ki jingeh jong ki.
