Guwahati, Naitung 2: Hynriew ngut ki briew ba kynthup ia u wei u nongtrei jong ka party Congress kila shah kem ha ka sngi Ba-ar ba kawang bilor plastic ha ka kali convoy kiba bud ia u Myntri Rangbah ka jylla u Himanta Biswa Sarma katba ki dang leit ban iuh kjat sha Golaghat.
Napdeng kine kiba la shah kem ki kynthup ia u Pallab Chetia, uba dei u Secretary jong ka Golaghat District Congress Committee, bad u Rahul Phukan, uba dei u khun jong u secretary barim jong ka Block Congress. Baroh ar ngut la iathuh ba kidei ki briew kiba iajan bha bad u Gaurav Gogoi uba dei u President jong ka Assam Congress.
Ha kane ka jingjia, wat lada ym shym la don kiba mynsaw namar ba u bilor ba kawang u khlem dei beit beit ia kano kano ka kali, u Myntri Sorkar ba peit ia ka tnad bording u Prasanta Phukan u la niew ia kane kum ka “jingma bad ka jingbym shngain” bad u la kynnoh ruh ba kane kadei ka “jingthmu ban pyrshang ban pyniap ia u Myntri Rangbah”. U la kyntu ba mardor dei ban peit bniah ha kaba iadei bad ki bor pahara jong u Samra.
Ia kane ka jingjia la ioh ban ring dur lyngba ka video bad kaba la saphriang bha kylleng, bad la kynnoh ba kadei kadei ba buit sianti ha ka sain hima sima. Ki nongkyrshan ka BJP kila pynlong ka jingiakhih ban pyrshah halor kane ka jingjia ha Dibrugarh, ha kaba kila dawa ban shim kam mardor bad ruh ban dawa pan mab paidbah na ka Congress.
Na ka liang ki nongialam ka party Congress kiba la ih bha ha ka sain hima sima ba kynthup ia u Bhupen Borah bad u Rakibul Hussain baroh ar ngut kila pynrem jur halor kane ka jingjia.
U Bhupen Borah u la ong, “Ka Congress ka ngeit skhem ia ka jingsuk ha ka jingiakhih paidbah bad ka jingkawang bilor sha u Myntri Rangbah da lei lei kadei kaba ym lah ban pdiang bad dei ruh ban pynrem jur.”
