Guwahati, Naitung 01: Ki Pulit ka Assam ki la sdang ban pyrkhing pyrshah ïa ka jingkhaïi be-aiñ ïa ka doh masi ha baroh kawei ka Jylla, da kaba pynlong ïa ki jingkhynra ha kajuh ka por ha kylleng ki district ka Jylla katkum ka ain Assam Cattle Preservation Act, 2021.
Kane ka aiñ ka khang pyrshah ïa ka jingpynïap masi bad ka jingdie ïa ki masi ha ki jaka ba marjan ba don ki riewngeit Hindu.
La pynlong ia ka jingkhynra ha Guwahati, Nagaon, Charaideo, Kokrajhar, South Kamrup, bad Dibrugarh, ha kaba la ioh ban kurup shibun ia ki doh im bad kiba la shet ba la suba ba ki dei ki doh masi.
Tang ha Kokrajhar, ki Pulit kila pynlong ka jingkhynra haki saw tylli ki Hotel.
La ïathuh ba la ioh kurup katto katne kilo ka doh masi, bad la kem bun ngut ki briew katba katto katne ngut kiwei pat ki la lah ban phet krad ha ka por ba ki pulit kila pynlong ia ki jingkhynra.
Palat 70 kg ka doh masi la ioh kurup na ki hostel ha ka thain Katahbari jong ka Guwahati mynta ka sngi ha ka jingkhynra ki pulit jong ka Garchok.
Kane ka jingkhynra ka wan hadien ka jingïakynad hapdeng ki jaidbynriew dang shen ha ka por lehniam Eid, ha kaba la kem ïa 16 ngut ki briew namar ba la kynnoh ba ki pyniap masi be-aiñ.
U Myntri Rangbah ka Jylla Assam u Himanta Biswa Sarma u la ban jur ba wat la baroh ki ioh laitluid haba iadei bad ka niam hynrei kino kino kiba pynkhein ia ka ain, kin shah pynngat kyndon.
