Mairang, Nailur 6: U Lamphang ka Jylla bad MLA ka Mairang, Bah Metbah Lyngdoh hynne ka sngi ba-ar ula plie paidbah ïa ka Nongthyllep Sub-Centre kaba la angnud la slem bha da ki paid nongshongshnong ka thaiñ Nongthyllep, Eastern West Khasi Hills District.
Ia kane ka jingialang plie ia ka Sub Centre la pynlong da ka ophis jong ka District Medical and Health Officer, West Khasi Hills District, Nongstoiñ ha ryngkat ka jingïatreilang jong ka Directorate of Health Services (MI), Meghalaya bad ka Health Engineering Wing Meghalaya, Shillong.
Haba ai jingkren, u Lamphang u la pynpaw ruh ïa ka jingsngewnguh ïa ki nongtrei ka tnat ka koit ka khiah, ki nongïalam shnong bad kumjuh kito baroh kiba la ïa don bynta ha ka ban pynurlong ïa kane ka Sub-Centre.
U la ong ruh ba ka jingplie ïa kane ka Sub-Centre ka long shibynta jong ka jingpyrshang ka sorkar, ban pynjan shuh shuh ïa ki jaka sumar nongpang sha ki paidbah, khamtam eh kito kiba hap hapoh ka jylli treikam jong ka Nongthyllep Sub-Centre.
Haba kren halor ka jingdonkam jong ka koit ka khiah ha ka jingim jong ki briew kaba man ka sngi, u kongsan u la kyntu ïa baroh kiba la sakhi lang ïa kane ka prokram bad khamtam eh ïa ki longkmie kiba armet, ba kin shim kabu ïa ka jingdon jong ka Sub-Centre ha shnong Nongthyllep, da kaba leit sumar bad phah eksamin tista bad ban ïalam ruh ïa la ki khunrit ban ïashimbynta ha ki prokram ai tika ki bapher bapher, ba ka tnat ka koit ka khiah ka ju pynlong na ka por sha ka por.
Kiwei kiwei pat kiba la kren ha kane ka jingïalang plie ïa kane ka Sub-Centre ki kynthup ïa u MDC ka thaiñ, u Bah Batskhem Ryntathiang, u Syiem ka Hima Nongkhlaw, u Pa’iem P.M Syiemlieh, u Deputy Commissioner ka Eastern West Khasi Hills District, u Bah W. Nongsiej, I District Medical & Health Officer ka West Khasi Hills District, Nongstoiñ, I Dr. S.A Lyngdoh, bad kiwei kiwei.
