Shillong, Jylliew 27: U Myntri ka Tnad Jngohkai u Bah Paul Lyngdoh hynne ka sngi Thohdieng ula pynbna ba ia ka Shillong Cherry Blossom Festival 2025 yn pynlong ha ka 14-15 tarik u Naiwieng.
Haba iakren bad ki nongthoh khubor u Bah Paul ula pyntip ba ka Meghalaya kala ioh pdiang ar tylli ki Pan-Asian Awards na ka WOW Awards Asia, kawei na ki rynsan kaba heh jong ka dewbah naka bynta ka jingai jingithuh ia ki tamasa kaba la leh da ka EventFAQs bad KPMG.
“Ngi dap da ka jingsngewtynnad ban pyntip ba ka Shillong Cherry Blossom Festival 2024 kala jop ia ka Gold Award ha ka ‘Special Event of the Year (Government)’ bad ka Gold Award haka ‘Festival of the Year (Culture)” ong u Bah Paul Lyngdoh.
“Kine kidei ki jingmih na ki tamasa kiba ngi lah pynlong, khamtam eh ia ka Cherry Blossom Festival.”
U Myntri ula ong ba ha u snem 2024, ka sorkar jylla kala bei T.23.5 Klur na ka bynta ki tamasa bapher bapher bad kala lah ban pynmih haduh T.133.42 Klur kaba la jan 6 shah ia ka jingiohnong na ka jingbei. Ha kine ki tamasa la sakhi ia ka jingwan tuid haduh 3.86 lak ngut ki nongwankai, 60,000 tylli ki jingpynmih ha ki Social Media bad palat 20 Million ngut kiba la peitkai.
Ki jingkhein ia ka jingpynmih pisa ha u snem 2024 :
Ka jingmih na ka jingdie Tiket: T.29.1 Klur
Jingkamai ki Hotel: T.33.8 Klur
Kiwei ki bynta kiba kynthup ia ka leit ka wan, ka bam bad ka leit iew leit hat:T. 37.1 Klur
Ka jingiohnong na ka F&B: T.6.9 Klur
Ka jingpynlut ia ka tamasa: T.18 Klur
Ka jinglah ban aikam: 5,509 ngut kum ki ba bylla sngi.
“Mynta ka pyrthei baroh kawei kala sdang ban phaikhmat sha ka Meghalaya,” u Bah Paul Lyngdoh ula ong, “Ki nongwankai ki wan na kylleng jong ka ri India, bun bha kiba wan na Maharashtra bad Odisha. Tang lyngba ka liengsuin marwei kala ioh ia ka khajna kaba kot T. 16.8 Klur katba ka jingai jingshakri ki kali ka jingiohnong ka long T.5.38 Klur.”
Ka tamasa kala kyntiew ruh ia ka jingsah ki briew ha ka Hotel kaba long 100% ha Shillong bad Sohra, kaba long 27% jong baroh ka jingpynlut. “Na ka bynta man la ka shi tyngka kaba la pynlut ha ki tiket, la lah ban iohlum T.334 ha kaba iadei bad ka sah, ka bam, ka leit ka wan bad ka leit iew leit hat” ong u Bah Paul.
Ha ka tamasa kaban long ha u 2025, yn wan ban pynshongshit da u Jason Derulo uba don ha ka kyrdan Top 10 na ki nongpynbyrngia Shynrang ha ka pyrthei bad ka Kynhun tem kaba pawnam ha ri Bilat “The Script, ia kaba la shim ba ka wan baar hadien jong ka kynhun tem Coldplay.
Ban pynlong ia ki nongpeitkai ba kin sah jingkynmaw, yn sdang ha ka sien kaba nyngkong eh ban sam da ki LED Wristbands bad yn pynshlur ban iaid da ka kjat naduh na Hotel Pinewood shaduh madan Polo yn sa pynbna ba kan dei tang ka jaka iaid kjat ha ka por ba pynlong ia katei ka tamasa.
Ia kane ka rynsan yn pynlong biang ha Shillong, ha J.N. Stadium, ha kaba yn don shuh shuh ki Festival Zones ha MFA Ground bad SRGT Ground.
Ki nongpyniaid ki don ia ka thong ban lum T.30,000 ha ka shi sngi ban pynneh ia ka jingdon ia ka kyrdan ban ia ka jingbun paid.
“Ka dor jong ka Tiket kan long kaba kham rem, hynrei ka jingpynleit jingmut kan long ha ka kyrdan, ka jingioh mad ia ka tamasa kaba ryngkat kyrdan ha ka pyrthei” la ong u Jason uba la mihkhmat ia ka Rockski.
