Shillong, Jylliew 27 : U Nongaiktien ka Sorkar MDA bad Myntri Bah Paul Lyngdoh ka sngi Thohdieng, ula pyntip ba Town Vending Committee ka la dep ban phah notice sha ki nongshongdukan madan ha Shillong ban pynkynriah noh ia ki sha ki Vending Zone (jaka shong dukan madan bala ithuh da ka Sorkar).
Kat kum ka jingong jong u, kumba 400 ngut ki nongshong dukan madan la dep ban ithuh hadien ka jingbishar bad ka jingjied kaba sani bha.
Kane ka jingkren u Bah Paul kala mih hadien ba ka Sorkar Jylla ha ka 21 tarik Jylliew kala pynbna ba ka mala ba hakhlieh duh jong ka Meghalaya Urban Development Authority (MUDA) kan dei noh ka ‘Vending Zone’ bad ki jaka ba sah jong ka thain Khyndailad kan long noh kum ka ‘No vending zone’ (jaka bym lah shuh ban shong dukan madan).
“Ngi iatip ia ki jingeh ba mih na ki jingshong dukan madan kaba la wanrah ia ki katto katne ki jingeh bad jingjynjar ia ki paidbah kiba pyndonkam ia ki lynti iaid ka Shillong bad ki surok ka Shillong” ong u Bah Paul haba iakren bad ki nongthoh khubor.
U Bah Paul u iathuh ba ka jingbuhpor ia ki nongshong dukan madan ba kin mih noh na ki surok, kala dep kut bad mynta ka Ain kan shim iala ka jong ka lynti.
Ula ban jur ba ka Sorkar kala dep ai ia ki jaka ba kyrpang ia ki nongshong dukan madan bad mynta ka shong ha ki la ki pdiang ne ki kyntait ia kane ka jingtyrwa.
U Myntri ula pynpaw ba ki surok ha Shillong kim dei tang na ka bynta kawei ka kynhun ba pyndonkam iaka surok. Ula ban jur ba ki nongiaid nongieng, ki bym shym la thaw ia ki seng lane leit sha Iingkashari, ka dei ruh ban hap pyrkhat lang ia ka hok jong ki.
“Mynta la ki kynriah ne em kam don jingmut shuh. Kila ia ioh ia ka jaka bala ai sha ki, la ki pdiang ne em ka shong ha ki…Ym don mano manor uh ba lah ban kam ba kane ka dei ka hok jong nga namar nalor ki nongniah kali, nalor ki nongshong dukan madan, phi don ruh ki nongiaid nongieng, kim shym la thaw seng, kim shym la leit sha IIngkashari, balei ba kin pynduh ia ka hok jong ki?” ula pynkut.
.){kind=link}