Shillong, Jylliew 27 : U Myntri kam Jngohkai Bah Paul Lyngdoh ula iathuh ba ka jingkynshew pisa ka Sorkar Jylla ba T.23.5 klur ha ka jingpynlong ia ki tamasa bapher bapher ha u snem bala dep, kala wanrah ia ka jingpynmih ha ka ioh ka kot ba T.133.42 klur, kaba long hynriew shah ia ka jingkynshew.
Haba iathuh ia ki jingtip ba kongsan na kane ka aiom tamasa, u Bah Paul ula pyntip ba haduh 3.86 lak ngut ki briew kila wan ban iashimbynta ha kine ki tamasa bad haduh 60,000 tylli ki video bala thep ha ki social media bad haduh 20 million ngut ki briew kila peit ia ki video lyngkot (reel).
Haba phai sha ka ioh ka kot, u Myntri ula iathuh ba ka jingpynmih pisa na ki ticket ka la kot haduh T.29.1 klur, ka jingioh kamai ki hotel ka long T.33.8 klur, kiwei kiwei ki kam kum ki kam kamai kali, ka jingiathied jingthied ki long T.37.1 klur, ka bam ka dih ka long T.6.9 klur bad ka jingpynlut ha kine ki tamasa ka long T.18 klur.
U iathuh ba kane ka aiom tamasa kala wanrah ruh ia ka lad aikam iajam bad haduh 5509 ngut kila ioh kam na kine ki tamasa.
U Myntri ula pyntip ba ki nongwankai na kylleng ki Jylla ka Ri bad ka pyrthei kila wan iashimbynta ha kine ki tamasa ba kynthup ia 1762 ngut kiba wan na Maharashtra bad 224 ngut na Odisha nalor kiwei kiwei ki Jylla.
Nalor kane, u Myntri u pyntip ba ka Shillong bad Sohra kila mad ia ka jingdap ki iing basa na ka jingwan ki nongshangkai, kaba synniang haduh 27% na ka jingpynmih pisa jong ka. Ka jingkamai ki liengsuin ka kot haduh T.16.80 klur ha kaba palat 18000 ngut ki nongwan shangkai kila wan da ki liengsuin. Ki Taxi kila kamai haduh T.5.38 klur.
Haba jubab ia ka jingkylli, u Myntri ula ban jur ba ka Meghalaya ka la don hakhmat eh ha ka jingkyntiew ia ka ioh ka kot lyngba ki concert (concert economy), ka jingmut bala kren dang shen da u Myntri Rangbah Duh ka Ri. Ka jingpyrshang jong ka Sorkar Jylla kala ai shibun ki jingmyntoi, kaba pyni ba ka concert economy kan iai neh bad long shibynta jong ka ioh ka kot ka Jylla Meghalata.
Haba kylli halor ka synniang ki kam jngohkai ia ka GDP ka Jylla, u Myntri ula iathuh ba ki kam jngohkai kila kylla long ka ioh ka kot ba wan ba lai ha ka jingheh duh ha Meghalaya.
