Shillong Jylliew 26: Arngut ki suba donkti ban pyniap ia u nongkhaii na Indore (L) Raja Raghuvanshi, kila kyntait ban phla ne kubur halor ka jingdonkti jongki hakhmat jong u Majistor.
U Superintendent of Police (City) Bah Herbert Kharkongor, uba khlieh ia ka Special Investigation Team (SIT), ula pyntip ia katei ha ka sngi Palei haba jubab ia ka jingkylli la kitei kiba suba donkti kila ai kano kano ka jingphla ne pynpaw eiei katkum ka kyndon 164 jong ka Code of Criminal Procedure (CrPC).
“Ngi lah phah ia ki 2 ngut napdeng ki 5 ngut kiba suba donkti, u Akash Rajput bad u Anand Kurmi, hynrei kine kila kyntait ban ai kano kano ka kubur (jingphla) hakhmat jong u Majistor” ong u Bah Kharkongor haba iakren bad ki nongthoh khubor.
“Hynrei kane kan ym ktah eiei, namar ngi lah don ia ki sabut ban pynshisha (ia ka jingdonkti ka jongki ha katei ka jingjia),” ula bynrap.
Kine kiba suba donkti ki don ia ka hok ban kyntait ban kubur ne ban phla hakhmat jong u majistor” katkum ka jingong u Bah Kharkongor.
Wat hapdeng kane, u SP ula pynpaw ia ka jingskhem jingmut ba ki pulit kila don ia ki sabut bad ia ki sakhi ban pynlong ia kane ka case kaba khlain bad ki iengskhem ha kaban pyndep ia ka Chargesheet hapoh jong ka 90 sngi.
“Ngi don bun ki sabut. Naduh kaba sdang bad haduh mynta bad kumjuh ruh ki tiar ki tar kiba ngi don kidei ki sabut kiba biang bha. Ngin ap ia ka kaiphod jong ka FSL bad nga ngeit skhem ba kan nang pynkhlain shuh shuh ia kane ka case” ula ong.
Ka SIT ka dang iai bteng ban tohkit ia kane ka jingjia bad ka dang trei shitom ban lum shuh shuh ia ki sabut bad ia ki sakhi satar. Ki pulit ki iengskhem ban chargesheet noh ia kane ka Case hapoh jong ka 90 sngi.
Baroh 5 ngut kiba suba donkti kiba kynthup ia ka Sonam Raghuvanshi, u baieid u jongka u Raj Kushwaha, Akash Rajput, Vishal Singh Chauhan bad u Anand Kurmi kila don ha ka Judicial Custody halor ka jingkynnoh donkti ha kaban pyniap ia u Raja Raghuvanshi ha Sohra ha ka 23 tarik u Jymmang.
 Raja Raghuvanshi, kila kyntait ban phla ne kubur halor ka jingdonkti jongki hakhmat jong u Majistor.){kind=link}