Lum u DyCM ia ka jingialang bishar kam halor ki project surok ka NHIDCL

Hun u DyCM ia ka jingiaid ki kam ka surok Shillong-Dawki

Shillong, Jylliew 23 : U Symbud Myntri Rangbah ba khmih ia ka Tnad Public Works Department (Roads) Bah Prestone Tynsong, ha ka sngi Nyngkong, ula lum ia ka jingialang bishar kam halor ka jingpyntreikam ia ki project surok bapher bapher bala pyntrei da ka National Highway and Infrastructure Development Corporation Limited (NHIDCL) ha Meghalaya.

Ki project bala shong bishar ki kynthup ia ka surok Shillong-Dawki, ka Shillong Western Bypass, ka Speed Corridor bad ka Tura Bypass.

Haba kren sha ki lad pathai khubor hadien ka jingialang, u Bah Prestone ula pynpaw ia ka jingihun haba iadei bad ka jingiaid ki kam jong ka surok Shillong-Dawki, wat hapdeng ki jingeh kiba mih hakhmat namar jong u slap.

“Nga thikna ba ngin lah ban pyndep ia ka project kat kum bala pynpaw ha ka contract order da ka NHIDCL. Nga la iohi ia ki kam ba kila iaid bha. Hooid, ngi don katto katne ki jingeh namar jong u slap hynrei nga thikna ban gin lah ban poi sha ka thong kat kum bala buh ha ka work order” ula ong.

U DyCM ula bthah ia ka NHIDCL ba kan pynsted ia ki kam, ban pynthikna ha kaban pyndep hapoh ka por bala buh jong u snem 2026. Kane ka project ka kynthup ia ka song ha Pynursla, kaba ki kam kila iaid bha shaid shaid.

U Bah Prestone ula pyntip ba ka project Shillong Western Bypass kala iatakhuh ia ka jingeh ba iadei bad ki kam jaka, ha kaba don ki briew kila mih ban kam trai ia ki jaka.

Ula bthah ia ki Deputy Collector ba kin pynbeit ia kine ki kam, ka ban pynthikna ba ka jingiaid jong ki kam kan ym shah pynthut. Ka por bala buh ban pyndep ia kane ka project ka long ha u 2026.

“ Nga la bthah ia baroh ki District Collector ba kin pynbeit ia kane ka kam bad ban pynthikna ba ka jingiaid ki kam kan ym shah pynthut bad ban pynthikna ruh ba ki briew kiba kam trai ki dei ban don ia ki kot ki sla kiba biang lem kumta kim lah ban shu kam matlah ia ka” ong u Bah Prestone haba bynrap “Ngi la shim ia ka rai bad nga bthah ia baroh ki District Collector ba kin leh ia kaba donkam bad nga thikna ba ngin lah pyndep ia ka project hapoh ka por bala buh”.

U Symbud Myntri Rangbah ula shong bishar kam ruh halor ka sorjamin ia ki jaka ban pyniaid ia ka surok Speed Corridor kaba sdang na Barapani (Umiam) sha khappud ka Assam bad pyntip ba kane ka kam kala jan dep artad mynta.

U pyntip ba ki District Collector kiba iatreilang bad ka NHIDCL ban shim rai ia u lain pdeng jong ka surok ha ryngkat ka kaiphod ka jingiaid ka kam ha baroh saw tylli ki District : Ri-Bhoi, East Khasi Hills, West Jaintia Hills bad East Jaintia Hills.

La ka don kano kano ka jingeh halor ka jaka puta bala iatakhuh da kane ka project, u Bah Prestone ula ong “Man ki District Collector kila shim ia ka jingbahkhlieh bad kila dep khot ia ka jingialang bad baroh ki kynhun khamtam bad ki trai jaka lem bad ki Khlieh Nongsynshar bad mynta ka sorjamin ruh kala jan dep artad. Nga thikna ba shen, kin sa lah ban ithuh wat ia u lain pdeng jong kane ka surok Speed Corridor”.

Halor ka Tura Bypass, u bah Prestone ula ong ba ka project ka dang don hapdeng ka jingpynkhreh bad u Deputy Commissioner ka West garo Hills bad South West Garo Hills ki dang pynkhreh ia ka 3d notification.

“Nga la shong bishar kam halor ka surok Tura Bypass sha Dalu. Ki District Collector ki dang pynkhreh ia ka 3d Nitification bad shen kin sa pyndep ia kane ka kam” ula ong.

Ia ka sngi ban sdang bad ban pyndep ia kane ka project ka dei ka kam ka ban dang shim rai, ula bynrap.