Shillong Jylliew 23: Ka Tnad Pule Puthi ka Jylla Meghalaya, kala pynbna ba la pyllait ia ka First Instalment (20%) jong ka Post-Matric Scholarship na ka bynta ki samla pule riewlum Scheduled Tribe (ST) na ka bynta u snem pule 2024-25.
Kane kan ai jingmyntoi ia ki 66,000 ngut ki khynnah pule ia kaba ka Bank Account ka jongki kadei kaba la dep pyniasoh lang bad u Aadhaar.
Ia ka pisa kaba dang sah yn sa pyllait lyngba ka Instalment ka 2-3 kaban shong katkum ka jingpyllait pisa jong ka Sorkar India.
“Ha u snem ba la dep, ka Sorkar India ka ju pyllait ia ka Post-Matric Scholarship ha ki 3–4 Instalment, ha kaba man la ki Instalment ka long tang na ka bynta khyndiat ngut ki khynnah pule. Kumta kane kala pynlong ia kiba bun ki khynnah ban shah ieh bad ban hap ban ap ban ioh pdiang ia katei ka Scholarship. Hynrei naduh kaba sdang mynta u snem, ka Tnad Pule Puthi kala shim ia ka sienjam kaba thymmai ban pynthikna ba man la ki khynnah pule kiba dei hok ban ioh ia ka pisa ha man la ki Instalment” ong u Commissioner & Secretary uba khmih ia ka Pule Puthi u Vijay Kumar Mantri ha ka kyrwoh khubor ha ka sngi u Blei.
Ula pynshai ruh ym dei ban sngewthuh bakla bad ka Chief Minister’s Scholarship Scheme, ia kaba la dep ban pynbna ha ka Mang Tyngka kaba la dep.
Ka jingrejistar na ka bynta ka Chief Minister’s Scholarship Scheme kan sdang hadien ba la dep ban pynmih ia ka jingpynbna paidbah ia ka jingpyntreikam ia katei ka Scheme bad ia ki kyndon jingbthah.
Ha ka 20 tarik u Jylliew, 2025, ka Tnad Pule Puthi kala sdang ban phah pyllait noh ia ka Instalment kaba nyngkong (20%) jongka Post-Matric Scholarship na ka bynta ki khynnah pule riewlum Scheduled Tribe (ST) na ka bynta u snem pule 2024–25, kaban ai jingmyntoi ia ki 66,000 ngut ki khynnah pule kaba ka Bank Account ka jongki kadei kaba la dep pyniasoh bad u Aadhaar, la pyntip u Mantri.
Ula bynrap ruh ba kaba sah, jongki 7,902 ngut ki nongioh jingmyntoi ki bym pat ioh ia ka scholarship, la dep ban phah ia ka jingpyntip lyngba ka SMS ha ka 20 tarik u Jylliew 2025 na ka National Scholarship Portal (NSP) ha ki mobile number kiba la rejistar da ki khynnah pule bad la kyntu ia ki ba kidei ban pynshisha bad ban pyniasoh ia u Aadhaar bad ki Bank ki jongki.
Hadien ba la ioh pdiang ia katei ka SMS, ki nongioh jingmyntoi ki ioh por 15 sngi ban ban bud ryntih ia ka jingpyniasoh ia u Aadhaar. Hadien ka 15 sngi, ki kot ki sla jong ka jingsiew jong kito kiba la dep ban pyniasoh bad u Aadhar yn sa pyniaid noh shakhmat lyngba ka NSP Payment Module, ula ong bad ka bynrap ba ka NSP System kam shah ban pyniaid shakhmat ia ka jingsiew hashwa ban kut noh ka jingai por kaba 15 sngi hadien ba la dep phah ia ka jingtip lyngba ka SMS.
Na ka bynta kino kino ki jingtip ne jingsngewkhia, ki khynnah pule ki lah ban phah ia ka jingthoh sha ka [email protected]. ne ban kren ha ki phone number 7005037347 bad 9077574956.
 jong ka Post-Matric Scholarship na ka bynta ki samla pule riewlum Scheduled Tribe (ST) na ka bynta u snem pule 2024-25.){kind=link}