Shillong, Jylliew 22: U Myntri Rangbah ka Jylla Conrad K Sangma, ha ka sngi Saitjain, ula pyllait paidbah ia ka kaiphod jong ka “Concert Economy” bad pyntip ba ka Meghalaya kala ioh kamai haduh T.133.42 klur na ki 7 tylli ki concert ba heh ba la pynlong ha Jylla tang ha une u snem bala lah.
U Myntri Rangbah ula pyntip ia kane haba pyllait paidbah ia ka samoi ba 3 (season 3) jong ka Meghalaya Grassroots Music Project (MGMP) ba long ha ka sngi Saitjain ha ka jingrakhe ia ka World Music Day ha Lariti Auditorium, Shillong, ha ka jingiadonlang u Myntri kam jngohkai Bah Paul Lyngdoh, ki nongrwai, nongput nongtem, kikynhun bapher bapher bad ki riew ieid jingrwai.
Kat kum ka jingong jong u, tang ha u snem bala lah, ka Jylla kala pynlong haduh 7 tylli ki concert kiba heh bha ha ki 13 sngi, kaba la poi iashimbynta haduh 3.86 lak ngut ki briew. Kine ki concert kila pynioh kamai haduh T.133.42 klur na ka jingkynshew pisa ba T.23.5 klur-ka jingioh kamai ba haduh 5.6 shah na kaba la kynshew.
U Myntri Rangbah ula pyntip ruh ba kine ki concert kila aikam ia palat 5500 ngut ha ka shisngi bad kila wanrah ia ki nong shangkai pyrthei na palat 20 tylli ki Jylla jong ka Ri India.
Haba ai jingkren ha ka jingialang, u Myntri Rangbah ula iathuh khana ia ka jinglong samla jong u bad ka jingiaksaid kum u nongtem. Ula kren bniah shaphang ki jingeh bala mad da ki nongput nongtem ha kine ki lai phew snem bala leit noh-na kaba pynlong iala ka jongka concert sha ka jingiaksaid ban ioh ia ka jingithuh bad ban ioh iala ki jong ki tiar tem.
Kine ki jingshem, u ong, kala pynwandur iaka jingiohi jngai jong ka Sorkar ban pynthikna ba kine ki pateng nongput nongtem ba mynta bad kiban dang wan, kin nym donkam shuh ban hap iaid ia ka lynti ba marwei ba kin pynpawnam ialade.
“Ngi kwah ban ai sha ki briew jong ngi ia ka jingshongshit ban pur ban tem na rynsan, ka jingithuh kaba ki dei ban ioh, bad ka rynsan ba kin iaid kat kum ka jingsngewtynnad jong ki” ula ong.
U Myntri Rangbah ula kren ruh halor ki prokram jong ka MGMP, kaba la sdang da ka jingkynshew ba tang T.3.5 klur bad 2500 ngut ngut ki nongtem bad nongrwai ha u snem ba nyngkong, mynta kala kiew bun bun shah sha ka T.69 klur bad kyrshah ia palat 5400 ngut ki nongrwai bad nongtem bad ia palat 38000 tylli ki rynsan iaput iatem ha kylleng ka Jylla.
Ula pynbna ba ka MGMP, bala pynkylla kyrteng sha ka CMHMP, kan nym long shuh ka project ba shipor hynrei kan long noh ka project ban eh shirta, kaba la pynwandur bha, bad ka prokram ba manla u snem jong ka Sorkar.
Kane ka jingpynkylla dur kan kynthup ia ka jingpynbeit ia ki tarik ban pynlong ia ki rynsan iaput iatem, ban shna pynbna ia ki jaka iaput iatem ha kylleng ka Jylla Meghalaya kum ha Nan Polok ha Shillong bad ki jaka ba paw ka Tura, nalor ki jing ai jinghikai ha ka put ka tem, ka rwai bad ka thoh jingrwai.
U Conrad ula pynbna ruh ba ka Sorkar ka don jingthmu ban wanrah noh ia ki jingiakop iaput iatem bad ka jingai jingkyrshan ia ki kam pynmih sur jingrwai nalor kiwei. “Ka prokram mynta ka dei ban iaid palat ia ka jingput jingtem nalor ka rynsan-ka dei ban pynmih ia ki sur tynrai nalade, pynneh ia ki jingput jingtem nala tynrai, bad ban btin lynti ia ka sap ki nong Meghalaya ha ki rynsan ka Ri bad ka pyrthei”.
U Myntri Tangbah ula pyllait ruh ia artylli ki document ha kane ka jingialang-ka CMGMP Rock and Tourism Festival Booklet bad ka Council Technology Booklet.
Ha kane ka sngi, la sam ruh ia ka MGMP Award sha ki nongrwai bad nongput nongtem ka Ri-lum Khasi, Jaintia bad Garo. Kiba jop ki long : Bending Waves, Magnificent Obsession, Strange Origin, Neil Umwi, Vanessa Suchiang, Snam Rangsa, nalor kiwei kiwei.
La air uh ia ka jingithuh ba kyrpang ba kynthup ia : Mayan Khasi, Bachin Yana Momin, bad Chevinia kum ki nongrwai ba dang khynnah eh, Tekisha Shabong bad Khongsam hapoh ka “The Sound of Music” awards ia ki nongrwai bad nongput nongtem ba don jingduna dkhot met, Dan & Zac bad Ricky Dawa kum ki fan favourite, bad Eno Kharkongor kum u Best Gospel Artist. Haduh T.10,00,000 la sam ia ka song khusnam sha kine ki nongrwai bad nongput nongtem.
