Shillong, June 21: Ka Refiiness Warjri, ka kynthei kaba lai na ka jylla Meghalaya kala kiew pyndep ne ‘Conquer’ ia u lumthah Mount Everest, kala shah pdiang burom hynne ka sngi Saitjain hadien ba kala wanpoi ha Shillong Airport ha Umroi. Ka jingwanphai ka jongka kadei hadien jongka jingiaid ia ka lynti kaba phylla ha kaba kane ka samla kaba na kawei ka shnong kaba rit, kala kiew sha kliar jong ka pyrthei ne “top of the world.”
Ka Refiness Warjri kala kiew ia u Mount Everest (8,848.86 m) dang step phyrngab ha ka 18 tarik u Jymmang ha ka por 4 baje mynstep, hapdeng ka jingmad ia ka lyer kaba dait thah, ka jingbym ioh ring mynsiem da kaba suk, bad ka jingjrong kaba la palat pud.
“Katei ka khyllipmat kala long palat ban ia ka jingjop jong nga shimet, kadei ka jingjop jong ka NCC, ka jylla jong nga, ka iing ka sem jong nga bad ia baroh ki khynnah kynthei ne shynrang kiba nud ban pynurlong ia la ka jingangnud” ka la ong, kaba la pyni ia ka jingjop ka jongka.
Kane ka khynnah kadei ka dkhot jongka 61 Meghalaya Girls Bn NCC, ka jingiaid lynti ban kiew ia u lum Everest kala sdang lyngba ka jingshah khot bad kadei kaei kaei kaba la ngam jylliew bha ha ka jingdonbynta ka jongka bad ka National Cadet Corps (NCC). Kala pyniasoh kum ka Junior Wing Cadet ha Auxilium School bad kala bteng kum ka Senior Wing Cadet ha St. Anthony’s College, kaba la ai nam ia ka NCC ban saindur ia ki khynnah ban long ki nongialam bad ban ai ia ka mynsiem jong ka jingdon akor bad burom bad kaba don jingmut.
Ka lynti ka jongka ban poi sha u lum Everest kadei kaba la saindur lyngba ka jingioh jinghikai kaba jynjar, kaba kynthup ia ka Pre-Everest Expedition da kaba leit sha u lum Mount Abi Garmin (7,355 m) bad ka Basic Mountaineering Course ha HMI Darjeeling, ha kaba kala ioh ia ka jinghikai pyntbit ha kaban kiew ia ki maw, u thah bad ki buit ban ai jingiarap. Ka jinghikai kaba la eh bha kadei ha ka por tlang ha kaba la ioh ia ka jinghikai ha Siachen Glacier, ka jaka ia tur thma kaba don hajrong tam jong ka pyrthei, ha kaba kala mad ia ka jingkhriat kaba la kot haduh -40°C bad kala ioh jinghikai kumno ban ialeh ban im ha ki krem thah.
Ka jingjop ha kaban kiew ia u Renok Peak (16,500 ft) ha Sikkim bad Lobuche Peak (6,199 m) ha Nepal kala pyni shuh shuh ia ka jinglah ka jongka. Ka Refiness Warjri kala pynkynmaw ba ka Lobuche ba kadei ka kaba eh bha, ha kaba kala hap ban iakhun ia ka jingpang bad ia ka jingsheptieng khamtam ha ka por miet hynrei ka jingiai bteng ka jongka ban pynleit jingmut kala pynlong ia ka ban ym kynran dien. Na ki 17 lak ngut ki dkhot ha ka ri, tang 10 ngut (5 ngut ki kynthei bad 5 ngut ki shynrang) kila shah jied ban leit kiew ia u lumthah Everest bad da ka jingsngew sarong ka Refiness kala long kawei napdeng jong kitei.
Ka jingleit kiew kaba khatduh kala sdang ha ka 11 tarik u Iaiong 2025 na Lukla, ha kaba kala iaid bad kiew ia ki jaka kiba eh ban poi sha ka Everest Base Camp (EBC) ha ka 19 tarik u Iaiong. Ha ka 14 tarik u Jymmang la sdang biang ia jingleit kiew ia u lumthah bad ka Refiness kala ong ba ka jingleit kiew ia ka “Death Zone” ka long kaba sngew shyrkhei bha, kaba la sdang ha ka jingdum tliw tliw ha ka por 7 baje mynmiet hapdeng ka jingkynjah bad ka jingjur ka lyer. Kala iohi ia ka jingshisha kaba triem ha ki lum, kynthup ia ka met jong ki nongkiew lumthah kiba la khlad noh bad kawei kaba don hapdeng ka jingring mynsiem ba khatduh bad ka jingthrang dik dik ban ioh dih ia ka um kaba long kaba kordor tam ha katei ka khyllipmat kaba shyrkhei tyngeh.
Haba kala poi sha kliar u lumthah, kala shondur, buh jingduwai bad peitkai bad ban kyndit ban iohi ba kala don halor eh jong ki lyoh. Ka khyllipmat kaba la ktah bha ia ka, kadei ha ka por ba kala khot ne pyrta ia ka kyrteng jong ka kmie bad u kpa jongka hadien ba kala dep kiew ha ryngkar bad ka iam haba kala ong, “Nga la pyndep”. “Nga sngew kumba nga la wanrah burom ia ka ri bad ia ka jylla Meghalaya sha kliar eh jong ka pyrthei” kala pynpaw.
Ka Refiness Warjri kala pynpaw ia ka jingsngewnguh kaba khraw ia ka NCC kaba la iarap ia ka ban sngewthuh iala ka jinglah bor bad ka kubur ba kam shym la poi pyrkhat ba ka khynnah kynthei na ka shnong kaba rit kaba ym don jingtip eiei shaphang ka jingkiew lum kan lah syndon ban ioh ia katei ka jingjop kaba kyrpang. Kala iaroh ia ki ophisar bad ia ki nongtrei jongka NCC, khamtam eh ia kito kiba na ka 61 Meghalaya Girls Bn NCC hapoh jongka NCC Group HQ Shillong bad NCC Directorate NER, kiba la ai ia ka jingshaniah kaba pura bad kiba la btin bad saindur ia ka ban long kaba tbit”.
Kala ai khublei ruh ia u nongialam ha ka jingkiew lum u Col. Amit Bisht bad Col. Rajneesh Joshi, ki kynhun kiba kala iadonlang, ki Sherpa kiba shlur bad ki kmie ki kpa kiba ai jingkyrshan bad ia u Blei.
Ha ka jingkyntu ia ki samla ka jylla Meghalaya, ka Refiness Warjri kala ong, “Wat nym sheptieng ban don ia ka jingangnud kaba heh. Pynleit jingmut ha kata ka jingangnud naduh ka dohnud baroh bad trei khlem shongthait ban pynlong ia ka sha ka jingshisha. Kam pher lada wan nangno nangno ruh, ka jingangnud ka long kaba shongnia bad ka jinglah ka jong phi kadei kaba ym don satia u pud. Da ka jingskhem jingmut, ka jinglong ryntih bad ka jingshaniah, kam don kano kano ka jingkiew kaban jrong bha, kan ym don kano kano ka jingangnud kaban long kaba heh ia ngi ban poi sha ka jingjop”.
