Shillong, Jylliew 21 : Ka Iingkashari ha ka sngi Saitjain, kala hukum ban set noh ia ka Sonam Raghuvanshi bad ia u baieid jong ka, u Raj Singh Kushwaha ha ka Judicial Custody ba 13 sngi.
Ia kane ka hukum la pynmih hadien ba ka kynhun Special Investigation Team (SIT) kala pyndep ia ka jingtohkit ba 10 sngi halor ka jingdonkti jong ki, ha ka jingpyniap ia u kurim ka Sonam, Raju Raghuvanshi ha Sohra.
“Ia ka Sonam bad Raj la ialam tian bishar hynne ka sngi hakhmat ka Iingkashari hadien ba kut noh ka police custody. Ia kine baroh arngut la phah sha ka judicial custody ba 13 sngi” ong u Asst Public Prosecutor Tushar Chanda haba iakren bad ki nong thoh khubor hadien ba mih na ka Iingkashari u Chief Judicial Magistrate (CJM).
U Chand aula pyntip ba ki Pulit ki khlem pan por shuh ban buh ia kine ki arngut hapoh ka police custody.
“Ki (Pulit) kila kyrpad ia ka judicial custody bad hadien ba bishar, ka Iingkashari kala phah ia kine baroh arngut sha ka judicial custody ba 13 sngi” ula bynrap.
Kat kum ka jingong u Chanda, ym shym la don satia kino kino ki nongiasaid ain kiba mihkhmat ia ka Sonam bad u Raj.
Ha ka sngi Palei, ka Iingkashari kala phah ia ki laingut kiba pyniap ia u Raja Raghuvanshi- Akash Rajpur, Vishal Singh Chauhan bad Anand Kurmi, sha ka Judicial custody ba 14 sngi.
Ha ka sngi Ba-ar, ka SIT kala pyndep ia ka jingpynwandur biang ia ka kam bymman ba kine ki 5 ngut kila leh, kaba lam ruh sha ka jingioh kurup sa ia kawei ka wait na kshaid Weisawdong, kaba pyndonkam ban pyniap ia u Raja Raghuvanshi.
