Takrain ki Shnong Upper Shillong ia ka NHIDCL ba pyntrei suki bad tang dep rukom ia ka surok Shillong-Dawki

Shillong, Jylliew 17 : Ka Synjuk ki Nongsynshar Shnong ka Upper Shillong (SNSUP), kila takrain ia ka National Highway Infrastructure Development Corporation Limited (NHIDCL) halor ka jingpyntrei suki bad trei tang dep rukom (sub standard) ia ka surok 4-Lane na Umshyrpi sha Upper Shillong-kaba long ka dawbah ba wanrah ia ka jingdheng kali kaba shyrkhei ha ka thain.

Ka Synjuk lem bad ki Heh Ophisar ka Jylla, ha ka step sngi Ba-ar, kila pynlong ia ka jingjurip lang ia kane ka surok na Umshyrpi sha 3 Mer ban peitthuh ia kiei ki jingeh kiba mih na kane ka jingshna ia ka surok 4-lane Shillong-Dawki National Highway.

Ha kane ka jingjurip, ka SNSUP bad ki Heh Sorkar, kila pynpaw ia ka jingbym ihun halor ka jingiaid suki palat bad ka jingtrei tang dep rukom ia kane ka surok National Highway bala pyntrei da ka NHIDCL.

Ia kane ka jingjurip la pynlong halor ka jingkyntu jong ka Deputy Commissioner ka East Khasi Hills bad ki Heh Ophisar kiba la iadonlang ki kynthup iaki Ophisar na ka Tnad Public Health Engineering (PHE), ka Ophis u Block Development Officer (BDO) ka Mylliem C&RD Block, ka National Highways and Infrastructure Development Corporation Limited (NHIDCL) bad ki Pulit Traffic.

U Bah Tosanbha Marweiñ, Block Development Officer (BDO) ka Mylliem C&RD Block, uba ialam kane ka jingjurip, ula iathuh ba ka jingjurip kala sdang naduh ka por mynstep na Jingkieng Umshyrpi bad iaid sha Lummawbah-101 area bad pynkut pat ha 3 Mer, Upper Shillong.

Ia kane ka jingjurip la pynlong ruh ha ka por ba dang thnem bha ka iaid ka ieng ki kali bad la sakhi ba ka bynta ha Jingkieng Umshyrpi, kala khapngiah bha, kaba lam sha ka jingdheng kali kaba shyrkhei ha ka thain.

“Ngi la ithuh ia katto katne ki kam kiba donkam ban leh eiei, khamtam ka jingkhapngiah ka lynti iaid ki kali namar ka jing pyntrei ia ka surok, kaba la pynpoi slem ia ki nongleit nongwan kiba leit sha Shillong” ong u Bah Marwein haba pyntip “Ka NHIDCL kala kular ia ngi ba kin sa shim ia ki sienjam ban leh eiei ha ki artylli ki jaka ba khapngiah eh kiba wanrah ia ka jingdheng kali kaba jur”.

Ula bynrap ba ka Ophis jong ka Block, ka tnad PHE bad ki Dorbar Shnong, kin ai ia ka jingiatreilang kaba pura ban iarap ia ka NHIDCL ha kaban leh eiei ia kine ki jingeh kiba mih khnang ban lah pynurlong noh ia kiei kiei kiba thmu haba pyntrei ia kane ka project.

U bah Daniel Thangkhiew, Advisor ka SNSUP, ula pynpaw ia ka jingbynniaw halor ka jingiaid suki palat jong ka project bad ka jingeh ba kala wanrah ia ki nongleit nongwan, bad ong “Ngi pynpaw ia ka jingbym sngewtynnad sha ka NHIDCL, khamtam halor ka jingiaid suki ka kam ha Umshyrpi”.

“Hynrei ngi la sngap ruh ia ki jingeh ba ki (NHIDCL) iakynduh. Kum ka Synjuk kila tyrwa ia baroh ki jingiarap na ki paidbah ka thain. Kane ka surok ka ktah ym tang ia ka thain Upper Shillong hynrei ia baroh ki nongleit nongwan na West Khasi Hills, Sohra, Pynursla bad wat na Ri-lum Garo. Kaei kaba sngew ktah eh ka dei ka jingsahkut ki kali shimet kiba kit ia ki nongpang kaba iaid da ki kynta. Kane ka dei ka bym lah ban pdiang”.

U Bah Daniel u pyntip ba ka NHIDCL kala ai ka jingkular ban pyndep noh ia ki kam kiba sah na Umshyrpi sha 3 Mer hapoh ka artaiew.

Lah bna kdew, ba ki bor District kila pynbna ban khang biang ia ka jingiaid ki kali ha ka por mynmiet lyngba ka Jingkieng Umshyrpi naduh ka 12 tarik Jylliew haduh ka 18 tarik Jylliew, namar ka jingshna ia ka surok.

Halor kane, u Bah Daniel ula ong ba ka Synjuk ki Nongsynshar Shnong ka Upper Shillong, ki pdiang ia kane ka jingkhang ia ka surok ban iaid kali ha ka por mynmiet khnang ban lah pyniaid sted ia ki kam. Ula kular ruh ba ka Synjuk kan ai ka jing kyrshan kynthup ka jingbuh iaki briew ki ban peit ia ka jingtreikam ka hukum nalor ban tehlakam ia ka jingshah tuh ki mar, kaba ka NHIDCL kala pynpaw hakhmat ka Synjuk.

Shuwa kane ka jingjurip, ka SNSUP kala aiti ia ka shithi ujor sha ka NHIDCL, ba pynpaw ia ka jingsngewkhia halor ka jing pynslem bad jingtrei tang dep rukom ia ka project, kaba la sdang pyntrei naduh u bnai Risaw 2023.

Ha ka shithi, ka SNSUP kala kyntu ia ka NHIDCL ba kan aikam ia ki contractor trai shnong ba kin pyntrei ia ki katto katne ki kam kum ka jingpynheh ia ka surok bad jingpyndap khyndew khnang ban lah pyniaid sted bad pynthikna ia ka jingtrei bha ia ka kam.