Shillong, Jylliew 14 : U Myntri Rangbah ka Jylla Conrad K Sangma ha ka sngi Saitjain, ula plie paidbah ia ka lympung ialehkai phutbol 4th Division League jong ka Shillong Sports Association (SSA), haba pyntip ia ka jingkut jingmut jong ka Sorkar Jylla ban kyntiew ia ki kam ialehkai phutbol bad ban pynlong ia ka Meghalaya kum ka Football Capital ha India.
Ka 4th Division ka dei ka jingialehkai phutbol U-20, ka ban iashimbynta da ki 29 tylli ki kynhun ialehkai. Haba kut jong ka samoi ialehkai, artylli ki kynhun ba kamai bun point eh kin kiew sha ka 3rd Division.
Ka jingialehkai kaba nyngkong la ialehkai hapdeng ka Thynroi Sports Club pyrshah ia ka Golflink Sports Club.
Haba kren ha ka jingialang ha SSA Stadium ha Polo, u Conrad ula pruid dak ia ki jingthmu ban leh ha ka kam ialehkai phut bol na ka bynta ka Jylla bad ong “Ka Sorkar ka don ia ka thong ban pynlong ia ka Meghalaya bad ka Shillong kum ka Football Capital jong ka Ri bad khnang ban kynjoh ia kane ka thong, shibun ki jingialehkai la pynlong ha baroh kawei ka Jylla”.
Ula kren ruh ia shibun ki sienjam bala shim da ka Sorkar, kynthup ka jingshna ia ki Artificial bad Natural Turf Stadium, ka Chief Minister’s Football Mission, ka Football Stadium ka ban sa mih ha Mawkynroh- ka ban long ka stadium ba hehduh ha ka Ri- bad ka National Level Football Academy.
“Ngi don ia ka plan kaba heh bha na ka bynta ka Meghalaya bad kaei kaba ngi leh mynta hangne ka dei ka bynta kaba kongsan bha jong ka plan” bynrap u Conrad.
U Conrad ula pynbna ruh ban iai bteng ha kaban ai ka jingkyrshan pisa na ka bynta kane ka lympung bad ong “Ngi la kyrshan ia kane ka lympung mynshemsnem na ka Chief Minister’s Special Grant da ka song pisa ba kot T.28 lak. Mynta u snem ruh la kyrpad ia nga ban kyrshan a kane ka lympung ialehkai bad nga sngewkmen ban pynbna ba ngan sa ai ia ka song pisa ba T.30 lak”.
“Ngan sa mang ia ka pisa ba T.30 lak ban pyniaid ia kane ka jingialehkai phutbol, ka ban sa kyrshan ia ka SSA bad ia baroh ki kynhun kiba ialehkai” ula ong.
Ka SSA kaba kynthup ia palat 95 tylli ki club bala pyniasoh, kan pynsdang ia ka samou ialehkai da ka lympung 4th Division U-20 bad sa pynbud da ka senior men division : Ka 3rd Divison, 2nd Division, 1st Division bad ka Shillong Premier Leagie (SPL).
Ka calendar ka kynthup ruh ia ka Women;s League bad ka Grassroot Football League na ka bynta ki khynnah U-10 haduh U-14, ki ba la buh ban long ha ki bnai Tlang.
Mynta u snem, ka SSA kala pynkhreh ban pynsdang ia ka lympung ialehkai Champion League Tournament, ka lympung ia lehkai ba thymmai ka ban iohi ia ki Champion bad ki Runners-Up na baroh ki Division jong ki shynrang ba kin iakhun para ma ki- ka sienjam bala leh da ka jingthmu ban kyntiew ia ka mynsiem ban ialeh bad ban plie lad ruh ia ki Club ba ialehkai bha ba kin paw.
Kiba la iadonlang ha kane ka jingplie ia ka 4th Division League ki kynthup ia u Bah Dipshon L. Nongbri (Honorary General Secretary, SSA), Robert Dkhar (Working President, SSA), Finely Pariat (Secretary, Meghalaya State Olympic Association), Daniel M. Thangkhiew (OSD u CM bad Vice President, SSA), ki rang ialehkai jong baroh ki kynhun kiba iashimbynta ha kane ka lympung bad kiwei kiwei.
, haba pyntip ia ka jingkut jingmut jong ka Sorkar Jylla ban kyntiew ia ki kam ialehkai phutbol bad ban pynlong ia ka Meghalaya kum ka Football Capital ha India.Ka 4th Division ka dei ka jingialehkai phutbol U-20, ka ban iashimbynta da ki 29 tylli ki kynhun ialehkai. Haba kut jong ka samoi ialehkai, artylli ki kynhun ba kamai bun point eh kin kiew sha ka 3rd Division.){kind=link}