Umiam, Jylliew 09: Katba ka jylla Meghalaya bad baroh ki lad pathai khubor ki dang iabunkam ban ia wad ia ka jingshisha halor ka jingshah pyniap u nongwan jngohkai na Indore, Madhya Pradesh, u Raja Raghuvanshi, uwei pat u nong Uttar Pradesh ula wan shangkai sha Jylla ban pynibor ia ki nongpyniaid ia ki jaka jngohkai bad pynjulor ruh ia ki jingdon jingem ha kane ka jaka.
Kane ka jingjia kala jia ha Thrills Fun Park kaba don ha Ladsharai, Ri-Bhoi District. Kane ka jingjia kala jia ha ka 5 tarik Jylliew.
Ki vdeo CCTV kiba la saphriang ha ki social media, ki pyni ba une u nong UP ba kam ialade ba u dei u shipai, ula jrong kti ia u trai jong ka Thrills Park Bah Eugene Niangti bad ruh ia ki nongtrei, hadien ba ki bat ia u na ka jingpynjulor ia ki jingdon jingem ha kane ka park.
Kat kum ka jingiathuh ki bor khmih, une u briew uba wan ryngkat ki bahaiing, ula leit rungkai sha ka Haunted House ba don ha kane ka park bad ynda ula rung shapoh, ula pynjulor ia ki jingdon jingdem hapoh kane ka jaka.
Kane ka jingdusmon jong u kala pynbor ia ki nongtrei ba kin bat ban iakren hynrei phewse kala poi pynban sha ka jingiania bad ynda u Trai ula leit ban tuklar, ula shah jrong kti pynbna ha une u briew bad hadien kane, ula mih bad phet noh na kane ka jaka.
Halor kane ka jingjia, na ka liang u Bah Eugene u khlem buh satia ia kano kano ka jingujor sha ki bor ka ain halor ka nongrim bad ka jingpyrkhat ba ioh ka ktah ia ki kam jngohkai hapoh ka Jylla.
