Shillong, Jylliew 8: Mynta ka dei ka sngi kaba 15, bad ka jingwad ia ka kurim u Raja Raghuvanshi, ka Sonam, ka dang iai bteng.
Ha ka sngi Saitjain, ki nonglum khubor Ka Shlem kila hiar sha ka shnong Nongriat, kaba don ka Jingkieng Diengjri ba paw nam bha. Kane ka dei ka jaka jngohkai kaba la pyniap biej ia u Raja bad ka Sonam, kaba pynlong ia ki ban leit kai sha ka shnong Nongriat.
Ka lynti iaid kjat ssha Nongriat na Mawlakhiat ka shimpor kumba 2.5 haduh 3 kynta bad kiba leit sha kane ka jaka ki hap ban hiar ia ki mawkyndon kiba don palat ia ka 3000 tylli.
Kine ki shikurim (Raja bad Sonam) kila poi ha Nongriat ha ka por kumba 5:30-6 baje janmiet ha ka 22 tarik Jymmang, ha ka jingsynran ki Tour Guide ne nongialam lynti na ka Shnong samla Bhakupar Wansai. Ia kine ki arngut la leit on ha ka Shipara Homestay ba kin sahmiet.
Uwei u Tour Guide Albert Pde ula leit tyrwa ia ka jingialam lynti ia kine ki shikurim ha Mawlakhiat hynrei kine ki arngut kila kyrngah namar ba kila dep buh ia u Bhakupar Wansai.
Ka Shipara Homestay ka don marjan bad ka Jingkieng Diengjri ba armala, kaba don ha Nongriat.
Haba iakren bad ka Shlem, u Bhakupar Wansai ula ong “Kine ki shikurim kila khot ia ngi ha ka 22 tarik Jymmang, ka por kala dei ha ka janmiet kumb 3.00-3:30 baje, hynrei nga khlem kyntait satia bad nga la rai ban ialam lynti ia ki sha Nongriat. Hadien ba nga buh ia ki ha Shipara Homestay, ngi la mih noh (u Albert Pde ruh u don lang). Ngi la tyrwa ban long biang ki nongialam lynti ha ka sngi kaba bud (23 Jymmang), hynrei kila kyntait.
Bhakupar Wansai, Tour Guide
Ha ka 22 tarik Jymmang, kine ki shijur kila phone ia ngi, ki dei ki nongwan shangkai bad kumta, ngi khlem kyntait ia ki. Kba 3:00-3:30 baje janmiet, ngi la leit ban on ia ki hapoh ka Shipara Homestay (Nongriat). Ngi la poi ha ka por kumba 5- 5:30 baje janmiet. Ngi la kylli, la ki dang donkam ia ka jingshakri jong ki lashai ka sngi, kine ki shikurim kila jubab “Ngi la tip ia ka lynti”.
Shlem : Katno baje kila poi ha kane ka homestay
Wansai: 5:00-5:30
Shlem: Ha ka 23 tarik Jymmang, phi iohi ia ki ba ki wan sha kaneka jaka
Wansai: Ngam shym la iohi namar ki don bun ki nongwan shangkai kiba leit kiba wan
Shlem : Ki don ki khubor ba katto katne ki briew kila bud ia kine ki shijur (Raja bad Sonam)?
Wansai: Ia kata ten gam tip, ki don bun ki nongwan shangkai kiba dang iakiew sha lum, ngam lah ban ong eiei ia kata.
Kila sah shimiet ha Shipara Homestay:-
Ka Trai jong ka Homestay, kong Sianti Sohkhlet kala ong “Hadien ba ki wan sah, kila pan bam, ia kaba la ai shaki ha ka por mynmiet. Ha ka step kaba bud (23 Jymmang) kila mih khlem bam ha ka por 5:30- 6 baje mynstep.
Sianti Sohkhlet, Trai ka Homestay
Ha ka 22 tarik Jymmang, arngut ki nongwan shangkai kila wan sah hangne (Shipara Homestay). Kila wan ryngkat bad u nongialam lynti. Ngam da kynmaw bha shuh ia ka por…hynrei nga tharai kumba 4:30-5 baje eiei. Kila wan hangne bad hadien ba kila poi, nga la pyni ia ki ia ka kamra bad kila ong, ka biang bad kin shim ia ka kamra.
Kila iashong hangne bad kila kylli ia ka dor bai kamra bad ka jingsiew ia ki nongialam lynti, hano ban siew ia ka jingsiew. Nga la ong ia ki ba mynta ka sngi. Kumta, u nongialam lynti ula kylli ia ki ba la ki dang donkam ne em ia ka jingshakri jong u lashai ka sngi, kila kyrngah da kaba ong em “Ngim donkam shuh ia ki nongialam lynti” haba sot ia ka jingkren u Raja.
Kumta, nga la shim ia ka pisa bad la kyntu ia ki ba kin iasoi ia ka register bad nga la ialam ia ki sha ka kamra jong ki.
Ynda kila rung shapoh, nga la wan phai noh shala ka jong ka kamra. Kila khang tala ia ka kamra lajong bad kila leit iaid kai sha ka Jingkieng Jri…kila wan phai hadien katto katne por, kala dum ka bneng.
Ngi la pynkhreh ia ka bam bad ngi la leit rah sha ka kamra jong ki. Kila iabam bad hadien kila leit thiah noh shala ki jongki kamra.
Ha ka step kaba bud, nga la khie ha ka por 5:30 baje mynstep. Kine ki shijur kila pyntip ha nga ba kin mih noh dang kloi. Kumta nga la kylli, la kin iabam jingbam step, kila kyntait da kaba ong “Ka dang kloi palat, ngim pat kwah bam eiei”.
Kila siew ia ka bai bam bad soi ia ka register kaba ngi buh, ba kin iamih noh.
Nga la kylli la ki dang kynmaw ia ka lynti iaid…kila ong “Hooid, ngi kynmaw” (bad kdew ia ki mawkyndon). Nga la ong “Ka biang kata, naba phi iakynmaw ia ka lynti…bad kila iamih noh”.
Shlem : Mynno phi ioh jingtip ia kane ka jingjia?.
Sohkhlet: Ngi ioh ia ka khubor ha ka janmiet sngi U Blei (25 tarik Jymmang). Nga iohi na ka mobile, kumta nga la kylli ia u Bah (Kurim), kine kim dei ki nongwan kai kiba sah ha ka homestay jong ngi? Haba nyngkong ula ong ..ba ym tharai satia…hynrei dei haba ula khmih ia ka register ba ngi sa tip ba ki dei kine ki juh ki briew na ka kyrteng ha ka register.
Shlem : Ha ka por ba ki wan hangne, ki iarah eiei hala ki jong ki kti?.
Sohkhlet: Tang ka pla airbag, kaba rit bad ka Kynthei ruh tang kawei ka airbag kaba rit.
Shlem: Ym don suitcase?
Sohkhlet: Em. Em.
Shlem: Ha ka por ba ki don hapoh ka guest house, ka don kano kano ka jingiania ne iamai hapdeng kine ki shikurim?
Sohkhlet: Em, Ngim iohsngew eiei ruh em.
Shlem: Ka don kano kano ka jingpyndik na ki Pulit ia phi ha ka por ba ki wan tohkit?.
Sohkhlet: Ki Pulit kila phone ia nga ha ka sngi Nyngkong (26) tarik Jymmang bad kylli ia nga, ia u Bah ruh (kurim) bad ngi la iathuh ia kaei kaba ngi tip. Ki Pulit kim shym la ong eiei shuh bad kila wan hangne bad kila khmih ia ka register bad kurup noh.
U Tour Guide Albert Pde ula iathuh ia kiba bun ki lad pathai khubor ba ula iohi khatduh ia kine ki shikurim ha ka por 10:00 baje mynstep jong ka 23 tarik Jymmang katba ki dang iakiew ia u mawkyndon ba 3000 tylli sha Mawlakhia. Ula iathuh ba ha ryngkat bad kine ki shikurim, ki don ruh lai ngut ki shynrang kiba dei ki nongshangkai, kiba la ia iaid lang.
Ka recording jong ka jingiakren phone hapdeng ka Kmie u Raja bad ka Sonam ( bala ngeit ba dei ka jingiakren ba khatduh shuwa ba ki shikurim kin jah rngai ha ka 23 tarik Jymmang) ka ong ba ka Sonam ka don ha ka jingshah thngan bad u Raja ula nang jam shakhmat katba ma ka, ka dang iaid nadien.
Ki jingiakren na ka phall call ba khatduh :
Kmie u Raja : Shaei u Raja?
Sonam :Ngi dang kiew ia u mawkyndon …u Raja u don shakhmat jong nga.
Kmie u Raja : Phi dang shah thngan?
Sonam : Hooid, nga dang shah thngan. Balei ba ngan pynkut noh ia ka jingshah thngan tang ba nga leit jingleit ? Ngi don hapdeng ka khlaw riat bha. Hadien ba nga poi sha lum, ngan sa pyniakren ia phi bad u Raja.
Kmie u Raja : Phi ia bam jingbam bha ne em?
Sonam : Ngi don hapdeng ka khlaw ba rben. Yn da nga la poi shalor lum, ngan sa bam.
Kmie u Raja : Nga la ong ia phi ban buh ia ki soh bad ki jingbam ban bam mynnin ka sngi (22 tarik Jymmang).
Sonam : Ka dei ka khlaw ba rben. Ban hiar shapoh ka pynnoh bha bad ka jingkiew shalor ruh ka long kaba jynjar bha.
Kmie u Raja : Phi ialeit ban peit iano shata?.
Sonam : Ngi iohi ia ka wah kaba itynnad….ka bam kam da biang satia. Ngi la dih coffee bad ka dud dang katto katne hynrei kam da bang re, kumta nga la bret noh.
Kmie u Raja : Phi jur bha ka jingkyndeh ban ring mynsiem.
Sonam : Hooid, Ngan sa phone ia phi hadien ba poi shalor lum.
Ka jingiakren ka paw ba ka jia ha ka por ba dang kiew ia ki mawkyndon, namar ka Sonam kala iai ban ia ka jingeh ban kiew bad kren ruh ia ka wahduid, kaba lah ban dei ka wah hajan ka Jingkieng Diengjri ha Nongriat.
Ha kane ka jingiakren bad ka Kmie u Raja, ka Sonam kam shym la khot satia ia u Raja ban pyntip ia u ba ka phone ka kmie. Kham bunsien, kine ki shijur ki ia iaid ryngkat ryngkat khamtam ha ka por ba iaid kjat. Namar ka jingdon lang ki 3 ngut ki nongjngohkai kiba dei ki shynrang, imat u Raja ula nang jam shakhamt katba ka Sonam kala iaid nadien. Kane ka iahap bad ka jingiathuh jong u Albert Pde, uba iohi ia ki shijur lem bad lai ngut ki shynrang ba wan jngohkai.
Police Case Report:
Ha ka 24 tarik Jymmang 2025, kumba 9 baje mynstep, u Sirdar ka Shnong Sohrarim (EKH) ula pyntip ia ka jingdon jong kawei ka Scooter (ML-05-AA-1472) kaba la shu ieh hapoh ka
shnong.
Haba wad ia u trai kane ka kali arshaka lyngba ka e-challan, la shem ba kane ka scooter ka dei kaba la shim wai ha ka 22 tarik Jymmang, 2025 da ki shi kurim-u Raja Raghuvanshi (27 snem) bad ka Sonam Raghuvanshi (25 snem), kiba dei na Indore, Madhya Pradesh. Ia kane ka scooter la shim wain a u Sagar Sen Samal ba na Keating Road, Shillong.
Ha ka jingtohkit, la shem ba ha ka 22 tarik Jymmang, 2025, kine ki shikurim kila wan poi ha shnong Mawlakhiat da kane ka scooter. Hangne, kila khot ia ki nongialam lynti, Bhakupar Wansai, uba la ialam lynti ia ki sha ka Shipara Homestay ha Nongriat, ka jaka ba ki sah shimet. Ha ka step 23 tarik, kine ki shikurim kila iamih noh na kane ka homestay bad kila wan phai sha Mawlakhiat khlem ki nongialam lynti. Dei hadien ba ki mih na Mawlakhiat, ym shym la tip shuh shano ba ki don, kaba la lam sha ka jingiawad ha kylleng ki jaka kiba don marjan ka thain.
Ha ka 2 tarik Jylliew por 11:48 baje mynstep, ka drone ki Pulit kala lap ia ka metiap hapoh ka riat bah riat san ba marjan ka kshaid Wei Sawdong ha Riat Arliang parking lot (EKH). Ia kane ka met bala kem pyut la tam da ki Pulit bad hadien la lah ban pynithuh ba ka dei ka met jong u Raja Raghuvanshi da ki bahaiing hasem. Ki Pulit kila pyndep ia ki jingdonkam baroh bad hadien kila pynkit noh ia ka met sha NEIGRIHMS ban leh ia ka post mortem.
Ka maian kabym pat lah ban batai :-
-Ia ka scooter la lap ba shu ieh ha Sohrarim ha ka 24 tarik Jymmang por 9 baje mynstep
– Ia ka met u Raja la lap najan ka kshaid Wei Sawdong ha Riat Arliang parking lot (ka riat bah)- kaba jngai 16 km da ka surok na Sohrarim.
– Ka kshaid Wei Sawdong kadei kaba dang khang ban leit ia ki nongshangkai namar ka jingiakajia na ka jingiakam trai hapdeng ki artylli ki Shnong.
– Na ka jaka ba lap ia ka metiap, ki Pulit kila ioh kurup ia ka wait bad ka phone kaba la sniew.
Namar ka kshaid Wei Sawdong ka dei kaba dang khang bad ki jaka pynieng kali ruh kala kynjah slam slam, ka jingkylli ka mih : Kumno kine ki shikurim-lane lehse tang u Raja-u poi sha kane ka jaka?. Lada ki shah pyniap, hangno kane ka kam bymman ka jia? Mano ba donkti? Bad kumno la kot ia ka metiap u Raja sha ka Wei Sawdong parking lot?.
