Shillong, Jylliew 07 : Ka Synjuk Ki Nongthohkot Khasi ne Khasi Authors’ Society ka la pynlong ia ka Dorbar Pyllun hynne ka sngi saitjain ha Shillong ban iatai ia kiba bun ki mat ba kongsan kiba dang sahteng da ki phew snem kiba iadei bad ka jingdawa pynrng ia ka ktien Khasi ha ka Khyrnit ba phra ka Riti Synshar ka Ri.
Ia kane ka jingialang la pynlong ha Iing Dorbar Jaiaw Shyiap Lumpyllon. Ki mat ba la iatai hakhmat eh ka dei halor ka jingiakhun ban pynrung ia ka ktien Khasi sha ka Khyrnit Bahynriew jong ka Riti Synshar ka Ri India, ban ai jingithuh noh ia ka ktien Khasi ym shuh tang ka Associate Language ka Jylla hynrei kum ka Official Language ba pura jong ka Jylla.
Kawei pat ka mat ba kongsan ka long ka jingpynmih ia ka dienshonhari na ka ktien Khasi sha ka Khasi bad sha ka ktien phareng (English) kaba la pynwandur da ka jingkyrshan pisa jong ka Tnad Arts & Culture, ka Sorkar Jylla bad ka Khasi Hills Autonomous District Council (KHADC).
Ka jingialang kala iatai ruh ia ki kam rakhe ia ki riewkhraw kum u Thomas Jones, Soso Tham bad kiwei kiwei ki jingialang sah kynmaw ha baroh shisnem kynthup ka National Seminar ka ban long ha New Delhi ha u snem 2026.
Ka jingalang kala sdang da ka ba kynmaw tympang ia ki dkhot ba la khlad noh, Bah Maurice G Lyngdoh bad Bah Darlingstone Dkhar (bam kwai ha Dwar U Blei) bad la bud ryngkhi da ki ktien lamphrang na u khliehduh Dr D R L Nonglait bad ka kaiphot na u Saiñpyniar, Dr Ronald P Kharshiing.
La pdiang dkhot ruh ia ki nongthoh thymmai ki ba kynthup ia u Bah Kitbok Nongkhlaw, Dr Badahunshisha Jana, Bah Banjop Leo G Kharmalki, Kong Frugiferous Diengdoh, Kong Jennifer Lyngkhoi, Kong Elisabeth Shylla, Dr Heipor Uni Bang, Dr Herina Dohtdong, Dr Rosa Mystica Mawlong, Bah Rangkitbok C Dohkrut bad Kong Evanisha Pathaw.
Ia kane ka Council la pynkut da ka jingjied thymmai ia ki nongkitkam kiba kynthup ia u Dr D R L Nonglait uba la iaineh kum u Khlieh Rangbah, Dr K D Ramsiej, Symbud Khlieh Rangbah, Dr Ronald P Kharshiing, Saiñpyniar Lumlang, Dr Esmarjune Kharpan, Symbud Saiñpyniar, Bah Kitbok Nongkhlaw, Treasurer, Dr M M Khymdeit, Sainpyniar jong ka Jylli Pynmihkot (Publication Committee) bad san ngut ki dkhot ha ka lyngwiar ki dkhot rangbah ba kynthup ia ka Prof Streamlet Dkhat, Dr Esther June Shongwan, Prof Badaplin War, Prof Desmond L Kharmawphlang, bad Bah Raphael Warjri.
