Nongpoh, Jylliew 05 : Kawei ka jingkieng iaid kali ha surok Mawlasnai-Tyrso kaba don hapdeng ka shnong Mawlasnai bad Umsaw Umdorbar, kala shong synjor bad lah ban twa ha kano kano ka por namar ka jingtwa khyndew ha ki bynta jong ka kynroh paia, kaba jia ha kine ki khyndiat sngi bala leit noh.
Kane ka jingtwa khyndew kala pynsyier ia ki nongleit nongwan khamtam ka jingtwa jong ki bynta ka surok ba pyniasoh bad ka jingkieng.
Halor kane ka jinglong jingman, ki Ophisar ka Tnad PWD (Roads) Bhoirymbong Division ha ryngkat ki nongialam shnong, kila hiar jurip ia ka jinglong jingman jong kane ka jingkieng hynne ka sngi Palei.
U Junior Engineer ka PWD Bah Ksanbok J.Diengdoh u iathuh ba kane ka jingtwa khyndew ka dei kaba la jia ha ka 30 tarik Jymmang na ka jingther u slap ba neh 3 sngi tam, uba la lynshop ha baroh kawei ka jylla.
U pyntip ba mar ia ioh jingtip ia katei ka jingtwa, ka Tnad kala hiar ban jurip bad kala phah kern oh da ki siej ia ka jaka ba twa kum ka jingai dak ia ki kali ba kin iaid husiar lyngba kane ka jingkieng.
Une u Engineer ula pyntip ba kane ka dei ka sien kaba ar bala wan jurip ia ka jingkieng ha ryngkat ki nongialam shnong khnang ba kin ioh ban sdang pynbha noh ia ka. U ong ba namar ka jingthut ka suinbneng, ka jingpynbna ka lah ban bam por sa kumba shibnai eiei.
Ula kyntu ia ki nongniah kali heh lane kino kino ki kali kit mar ba khia ba kin kiar ban iaid na kane ka jingkieng katbym pat dep ban maramot.
Na ka liang u Rangbah Shnong ka Umshangktad Bah Batskhem Sohtun ula ai khublei ia u MLA ka Mawhati Bah Charles Marngar uba la shimkhia ban phah mardor ia ki Ophisar ka Tnad PWD ban jurip ia kane ka jingtwa khyndew bad ban phah maramot noh kloi ia ka jingkieng.
