U Drok u pynjot ym tang ïa kiba dih hynrei ïa ka imlang sahlang: MLA
Nongstoiñ,Jymmang 04:U Superintendent of Police ka West Khasi Hills BD Marak ula pyntip ba ka kam khaii droks ha West Khasi Hills kala nang kiew katba nang iaid ki snem haba pyntip ba ha kine ki 15 snem, haduh 43 tylli ki case la register bad 54 ngut ki briew la ioh kem bad pynngat ha ka kyndon NDPS Act.
Une u heh Pulit ula pyntip ia kane haba kren ha ka jingialang District Level Nasha Mukht Bharat Abhiyan (0.2) Campaign bala pynlong hynne ka sngi Balang ha Trysem Hall jong ka Ophis u Deputy Commissioner.
“Baroh ki case hapoh ka NDPS Act naduh ka 4 tarik Jylliew 2011 haduh 4 tarik Jylliew 2025 ki long haduh 43 tylli bad napdeng kine 54 ngut ki briew la ioh ban kem kaba kynthup ïa 53 ngut ki Shynrang bad kawei ka Kynthei” ong une u Heh Pulit.
Une u Heh Pulit ula pan ia ka jingiatreilang jong ki Kmie ki Kpa kiba don ia ki Khun kiba kyrdih dih droks, ba kin mih sha khmat ban pyntip sha ki bor ba dei khmih khnang ba kin ioh ia ki jingiarap ban pynbeit ia ki khun jong ki.
Une u Heh Pulit ula ong ruh ba lada ki paidbah ki iohi ne lap ia kino kino kiba dik ne khaii droks, kim dei ban tieng ne salia ha ka ban pyntip sha ki Pulit da kaba phone ha u nombor 112.
Ia kane ka campaign la plie da u MLA ka Nongstoin Bah Gabriel Wahlang kum u kongsan ha ka jingiadonlang u Bah H.K Thabah MCS (ADC) u ba la pynïaid ia ka prokram, Kong D. Pakynteiñ (DSWO) bad member secretary (NMDA), Dr. M. Sohliya (DMHO), Dr Marweiñ, Dr. Lyngkhoi, Kong D.Hujon DSEO, Bah W. Shabong CDPO, Kong D.Wahlang (Theo Integrated Rehabilitation Centre).
Kiwei pat ki dei ki heh sorkar bad ki nongtrei sorkar na ki tnad ki bapher bapher, ki rangbah shnong, ki khynnah skul, ki sengbhalang, Urban Mission jong ka Balang Presbyterian New Nongstoiñ lem bad kiwei kiwei kiba ju ïa don bynta lang.
Haba kren kum u Kongsan ha kane ka sngi, u Bah Gabriel da ka sur kaba jam u la kyntu ban ong, ‘Em Ïa U Drok bad Hooid Ïa Ka Jingim’. Kum u nongmihkhmat jong ka Nongstoiñ, u dap da ka jingsngewkhia ban ïohi ïa ka jingkiew sted jong une u jingdih kynsha, u ba la pynjot ym tang ïa kiba dih. Hynrei, ïa ki kmie ki kpa, kiba haïing hasem bad ïa ka imlang shalang hi baroh kawei.
U la ong ba 65% jong ka Ri ki dei ki samla, kiba dei ki lawei ban ïalam ïa ka ri ha ki bynta ki bapher ki bapher. Hynrei lada ki samla ki ngop noh ha kum kine ki jingdih kiba sniew shano ka lawei jong ka Ri kan don.
U Bah Gabriel u la ban jur ïa ki samla ba kin long kiba stad ban ym jied bakla ïa ka lynti, wei ba la bakla ka la shem shitom ban lait na ki ‘liewlep jong u drok. U la buh ka jingkyntu ïa baroh naduh ki nongsynshar shnong, ki nonghikai, bad baroh ban ïatreilang ban pyllait ïa ka dong ka thaiñ na u drok bad ban wanrah pat ïa ka suk ka saiñ hapoh ki ïing ki sem, ki shong ki thaw jong ka Nongstoiñ.
Ha kane ka sngi la pyllait paidbah ïa kawei ka sur jingrwai kaba la shna bad pynbit pynbiang da u Bah Josephas Thongni, kaba la pynmih da ka District Social Welfare Officer Nongstoiñ, ka jingrwai kaba rah ïa ka khubor ban ïalap pyrshah ïa u drok, bad ban wanlam pat ïa kiba la kyrni ha ki jingdih kiba sniew sha ka jingim kaba thymmai.
