Shillong, Jylliew 04 : Ka Sorkar Jylla kala rai ban pynkhlain ia ki nongrim jong ka ban pynthikna ba ki “Jingkieng Diengjri” (Living root bridge) kin shah pynbna noh kum ki ‘World Heritage Site’.
Namar kata, ka Kynhun Myntri ka Sorkar Jylla kala ai jingmynjur ia ki Amendment jong ka Meghalaya Heritage Act, 2025 ha ka jingialang kaba la pyniaid da u Myntri Rangbah ka Jylla Conrad K Sangma hynne ka sngi Balang.
Haba kren sha ki nongthoh khubor hadien ka jingialang, u Conrad ula ong ba ka jingthmu ba kongsan eh jong kane ka jingpynkylla ia ki kyndon ka Meghalaya Heritage Act ka long ban pynrung ia kaei kaba ngi khot ka “Living Heritage”, ne ki jingtei u menbarim kiba im.
“Ia kane la leh kat kum ki jingthoh jong ngi sha ka UNESCO ba kan pynbna noh ia ki “Jingkieng Diengjri” kum ki World Heritage Site bad ma ngi ban nang pynkhlain ia ki nongrim, ngi la pynkylla ia la ka jong ka Meghalaya Heritage Act ban pynrung ia ki kyndon ki ban pynbna ia ki jingtei ki menbarim kiba im (living heritage) kum ki Jingkieng Diengjri kum shibynta na ki jaka ba ai jingiada” ula ong.
Nalor kane, u Conrad ula pyntip ba ka Sorkar kala rai ruh ban pyllait noh ia ka jingthied ia ki jaka ne long trai ia ki jaka ba don ki jingtei u menbarim kiba im, lada ki dei kiba longtrai da ki Shnong ki Thaw ne ka Imlang sahlang.
“Ngi la rai ha ka Kynhun Myntri ba ka Heritage Act kaba rim, ki don ki kyndon ba donkam ia ka Sorkar ban hap thied ia ki jaka lane ki nongkynti ba kan pynbna kum ki jaka ban ai jingiada. Mynta ngi la pynrung ia kane ka kynhun kaba ong ba ka Sorkar ka lah ban pyllait ia ka jingthied ia kka jaka ne shimti ia ki jaka ba don ki jingtei u menbarim kiba im lada ki dei kiba long trai da ki Shnong ki Thaw ne ka imlang sahlang, kaba mut ba kam long kongsan shuh ba ka Sorkar kan hap thied ia ki jaka lane ban long trai namar ka dei kaba la long trai da ki shnong ki thaw ne ka imlang sahlang” ula ong.
