Shillong, Jylliew 04: Ka Drug Reduction Elimination and Action Mission (DREAM) hynne ka sngi kala leit jngoh iaka jingtrei jong ka Sorkar ban pynlong jaka sumar lane Rehabilitation Centre iaki ba kyrni Drok ha Nongstoin West Khasi Hills.
Iaka kynhun la ialam da u Mission Director ka DREAM u Bah Francis Kharshiing haka jingdon lang u MLA ka Nongstoin u Bah Gabriel Wahlang, Deputy Commissioner ka West Khasi Hills lem bad ki ophisar ka Tnat District Social Welfare, District Agriculture, ki dkhot ka Urban Mission, New Nongstoin Presbyterian Church bad ki nongialam Shnong.
Ka jingtei (Building) jong ka Sorkar ka don ha Upper New Nongstoin bad kadei ruh ka thong jong ka Urban Mission, New Nongstoin Presbyterian Church ban iakhun iaka thma Drok da ka jingkyrshan ka DREAM.
Ka jingleit jurip ka dei kum shi bynta ban bishar iaki jingdon jingem ka jingtei (Building) khnang ban pynbha shuh shuh iaka jaka sumar.
Ka jingthmu ban buh iaka jaka sumar (Rehabilitation Centre) kadei kaba la ioh jingkyrshan na baroh kiba don jingkitkhlieh ban pynduh jait ia Drok naka imlang sahlang bad naka Jylla baroh kawei.
Haba kren ha kane ka sngi u MLA ka Nongstoin u Bah Gabriel Wahlang u la iaroh iaka DREAM kaba ka iohi jngai ban don daka jaka sumar lane ka Rehabilitation Centre ha Nongstoin ban iakhun pyrshah ia ka jingjyllei Drok.
U Bah Gabriel u la ong ba kane ka jingiatreilang bad ki kynhun bapher bapher kan long ka jingkyrkhu iaka thain haka thma pyrshah Drok khamtam ban sumar ia kito kiba la ngop ha u Drok.
Ka thong ban don jaka sumar lane Rehabilitation Centre jong ka Sorkar kadei ban pynthikna ba baroh ki ioh ka lad ban phah sumar ha baroh ki District ka Jylla.
