Shillong, Jylliew 02 : Ka Sorkar Meghalaya bad Assam kila mynjur ban pyndep noh ia ka jingsieh mawpud ba thikna ha ki 6 tylli ki jaka bala dep iakren pynbeit, shuwa ka jingrakhe ia ka Independence Day (ID) ne hapoh ka 15 tarik Nailar.
Ia kane la pyntip da u Myntri Rangbah ka Jylla Conrad K Sangma hadien ka jingialang bad u Myntri Rangbah ka Assam Himanta Biswa Sarma, kaba long hynne ka sngi Nyngkong ha Guwahati.
Kine ki 6 tylli ki jaka ki dei napdeng ki 12 tylli, kiba la dep ban iapynbeit da ki artylli ki Jylla bad la dep ruh ban iasoi ia ka soskular MoU ha u Lber 2022 hakhmat u Myntri Kam Pohiing ka Ri Amit Shah, ha Delhi.
“Napdeng ki hynriew tylli ki jaka bala dep iasoi soskular, ngin pyrshang ban sieh mawpud noh ha ki 5 tylli ki jaka hashuwa ka 15 tarik Nailar” ong u Himanta ha ka jingiakren bad ki lad pathai khubor ryngkat u Conrad hadien ba wai ka jingialang.
“Ka don katto katne ka jingbym iasngewthuh jingmut ha kawei na ki hyniew tylli ki jaka. Ka Meghalaya ka kwah ia kawei ka shnong bala ai sha nga ban pynphai pat hynrei kila ai ka jingkular ba kin sa ai bujli da kawei pat ka jaka kaba heh mar kumjuh. Ngi la pan por shi taiew ban shong pyrkhat bad sa pyntip sha ki” ula bynrap.
U Himanta ula ong ba kane ka jaka ba dang don jingiapher jingmut ka dei ka thain Pilingkata haba pyntip “Ki Deputy Commissioner jong baroh artylli ki Jylla kin ia shong bad iakren pynbeit ia ka kam”.
Kumjuh ruh u Conrad K Sangma ula ong ba ia ki kam kiba rit ba ria la dep ban iapynbeit lut bad mynta ka jingsieh ia u mawpud ha ki san tylli ki jaka la khmih lynti ban dep hashuwa ka Independence Day.
“Ka rai halor ka jingiakajia pud bala iapynbeit da ki bynta bynta, ka dei u mawmer uba khraw bha ha ka jingiadei hapdeng jong ngi” ong u Conrad.
U Himanta ula pyntip ba ki ar Jylla kila rai ban pyniaid shakhmat ia ka jingiakren haba iadei bad ki hynriew tylli ki jaka ba iakajia ba dang sahteng hynrei ym pat shymla buh por lano ban pyndep ia ka.
Ka Jylla Assam bad Meghalaya ki la don hapdeng ka jingiakajia pud kaba la slem bha ha ki 12 tylli ki jaka khappud ba heh kumba 884.9 sqkm.
Napdeng kane, haduh 36.79 sqkm ka jaka ba iakajia la iapynbeit ha ka wat iakren khappud ba nyngkong, kaba long ha ki 6 tylli ki jaka. Ka Assam kala ioh 18.46 sqkm bad ka Meghalaya kala ioh 18.33 sqkm.
Ka kynhun na Meghalaya kiba la iadonlang ha ka jingialang ki kynthup ia u Myntri ka tnad Jngohkai Bah Paul Lyngdoh bad u Chief Secretary Bah DP Wahlang bad kiwei kiwei ki heh Sorkar. Na ka liang pat la iasynran ia u Myntri Rangbah Himanta Biswa Sarma da ki Myntri Sorkar bad ki Heh Ophisar.
