Shillong, Jylliew 02: Ka kynhun jong ki pulit hynne ka sngi Nyngkong kala lap ia ka metiap ia kaba la suba jur ba ka lah ban dei ka jong u Raja Raghuwanshi najan ka Kshaid Wei Sawdong kaba don ha Sohra bad mynta ki dang hiar sha kane ka Kshaid ban shimti noh ia kane ka metiap.
Katkum ki khubor kaba la iohlum na ki pulit, kila iathuh ba kila lap ia ka metiap ia kaba la ioh ring dur lyngba ka Drone bad la suba jur ba ka lah ban dei ka jong u Raja kaba don ha ka Kshaid Wei Sawdong bad ka kynhun kaba leit wad kala leit hiar ban leit shim ia kane ka metiap bad ban ioh ruh ia ka jingpynthikna na ki bahaiing bahasem kla kadei ne em ka met jong u Raja.
Hadien ka jingsuba jur ba kane ka metiap ka lah ban dei ka jong u Raja, kumta la pynjur shuh shuh ia ka jingwad ban lap sa ia ka kurim kaba la suba jur ba ka lah ban don lang ha katei ka juh ka jaka bad haduh ba thoh ia kane ka khubor ym shim la ioh ia kano kano ka jingpynthikna la katei ka metiap kadei ka jong u Raja Raghuwanshi.
U Raja Raghuwanshi 30 snem ka rta bad ka Sonam Raghuwanshi 27 snem ka rta, ki shi kurim kiba na Indore, Madhya Pradesh kila jah naduh ka 23 tarik u Jymmang ha Sohra (Cherrapunji).
Dang hynin ka sngi, u Vinit Raghuvanshi u hynmen jong u Raja, ula kyntu ia u Myntri Rangbah ban shah ia ki Delhi Police, BSF bad ia ki shipai ban donlang ha ka jingleit wad ia kine ki shi kurim. Namar ka jingbym hun ia ka jingpyrshang jong ki pulit ka jylla ha kaba kim shym la lapksai eiei watla mynta kala iaid 10 sngi, ula ngeit skhem da ka jingdonlang jong ki shipai kan iarap shibun ha ka jingleit wad bad ban ioh noh shen ia ka resol.
Ha ka taiew kaba la dep, u Myntri Rangbah ka jylla u Conrad Sangma ula pynthikna ba ka sorkar kan trei borbah ha ka jingwad ban lap ia kitei ki shijur bad ula ong ba ula khmih hi dalade ia katei ka jingpynlong ia ka jingleit wad. Ka kynhun kaba don 50 ki briew kaba kynthup ia ki pulit ka jylla SDRF, ki trai shnong, ki Drone bad ka K9 Unit, kila bteng ban leit wad ia kitei ki shijur wat hapdeng jong ka jingpynthud jong ka suinbneng bad ka jinglong riat jong ki jaka.
U Raja (30) bad ka Sonam (27) kila poi ha Sohra da kawei ka thuk thuk kaba kila shim wai ha ka 22 tarik u Jymmang bad kila leit iaid da ka kjat sha Double Decker Living Root Bridge ha ka shnong Nongriat ia kaba la synran ia ki da uwei u nongialam lynti u Bha Wansai. Kila sah shi miet ha Shipara Homestay ha Nongriat bad kila mih noh ha ka por 6 baje mynstep ha ka 23 tarik u Jymmang hynrei kim shym la wanphai sha Mawlakhiat. Hynrei ym shim la don pat ban iohi ba kine ki shijur kin iaid kjat na Nongriat ban leit sha Mawlakhiat ne ban leit shim ia ka thuk thuk kaba don ha ka jaka pynieng kali ha Mawlakhiat wat hapdeng ka jingjur jong ki kam ki jam kiba iadei bad ka kam jngohkai.
Ha ka 24 tarik u Jymmang ha ka por 9 baje mynmiet, u Sordar jongka Sohrarim ula pyntip shaphang ka thuk thuk kaba la shu ieh ha katei ka shnong bad ha ka jingbuddien la ioh jingtip shaphang kitei ki shijur lyngba ka ER-Challan ha ka 25 tarik u Jymmang ha ka por 2:30 mynsngi. Ki bahaiing bahasem kila ujor da ka ejahar halor ka jingjah ka jongki bad la rejistar ia kane ka ejahar, la ong u ADC ka Sohra.
Ha ka 22 tarik u Jymmang kine ki shijur kila leit rung nyngkong ha Manha Homestay ha Saitsohpen, Sohra ha kaba kila buh ia ki tiar ki tar ki jongki namar ka jingbym ioh jaka sah shuh bad na ka jingjur slap, ha kaba kila ai ruh ia ka kyrteng bad phone number, hynrei la ioh jingtip pat hadien, ba kine kila leit sha Nongriat.
