Nalor ka jingjia Umsohsun, ula khyllie skad ia kawei ka Khynnah skul hajan Dreamland
Shillong, Jymmang 29 : Ki Pulit ka East Khasi Hills, kila ioh ban kem ia u riewjaboh uba donkti ha ka kam khyllie skad ia kawei ka khynnah skul-kaba la jia ha ka taiew bala lah ha ka thain Umsohsun, Shillong.
Kat kum ka khubor Pulit, ia une u briew uba dei u bar jylla ba na Assam la ioh ban kem na ka Jorhat Assam bad u dei ruh uba trei ha kawei ka restaurant hapoh ka thain Oakland Road, Shillong.
Hashuwa kane ka jingjia ha Umsohsun, une u runar ula jrongkti bad kynshlein ruh ia kawei ka khynnah skul ha ka thain Dreamland, Police Bazaar, kaba la jia ha ka 19 tarik Jymmang.
Kat kum ka jingiathuh u Superintendent of Police Bah Vivek Syiem, une u briew u dei uba la tip kyrteng u Himai Gagoi ba 24 snem ka rta, uba dei na Jorhat, Assam.
U Bah Vivek u iathuh ba ha ka 24 tarik Jymmang, ki Pulit kila ioh jingtip na kylleng shaphang ka video ba saphriang ha ki rynsan social media ba pyni ia u briew uba khyllie ia ka skad jong kawei ka khynnah skul bad shondur ruh ia ka da ka mobile phone. U pyntip ba mar mar ki Pulit kila thaw ia ka Kynhun ba kyrpang hapoh ka jingialam u MPS Ivan B Diengdoh ban tohkit bad thwet ia une u runar.
U iathuh ba ha ka jingtohkit, la ioh lum jingtip ba kane ka jingjia khyllie skad kala jia ha ka 23 tarik Jymmang ha ka por kumba 6:35 baje mynstep bad ki Pulit kila ioh pdiang ia ka ejahar ha Lumdiengjri Police Station kiba la register ia ka case hapoh ka kyndon 76/99 BNSS pule lang bad ka kyndon 11/12 jong ka POCSO Act.
U Bah Vivek u iathuh ba sa kawei ka khynnah skul kala ujor ejahar ha Shillong Sadar Police Station ba pyntip ia ka jingshah khyllie skad ha ka 19 tarik Jymmang por 7 :30 baje mynstep ha ka thain Dreamland, Police Bazaar. Ia kane ka case la register hapoh ka kyndon 7/8 jong ka POCSO Act.
U iathuh ba tang hapoh lai sngi, ka kynhun kyrpang ki Pulit kala lah ban ithuh ia une u runar ba kyrteng u Himan Gagoi uba la phet krad sha Jorhat Assam.
Ka kynhun ki Pulit hapoh ka jingialam jong ka WPSI Lavinia Khongwang kal hiar sha Jorhat ha ka 28 tarik Jymmang bad ha ka step kaba bud, kila pynlong ia ka jingkhynra ha ryngkat ki Pulit ka Lahdoigarh Police Outpost ka Jorhat bad kila ioh ban kem ia une u runar uba la rieh ha ka Iing jong ki bahaiing kaba don ha ka shnong Bamkukurachua, kaba hap hapoh ka Teok Police Station, Jorhat.
U Bah Vivek u iathuh ba kane ka kynhun kala ioh ban kurup ia ka mobile phone bala pyndonkam da une u runar lem bad kiwei kiwei ki sakhi. La shem ruh ba ula donkti ruh ha kawei ka kam bymman kaba la register case ha Teok Police Station hapoh ka kyndon 329(3)/79 BNS Act.
Ia une u runar yn sa ialam tian bishar ha District Court Jorhat bad hadien ba ioh jingbit ban wan ialam sha Jylla, yn sa ialam tian bishar ia u ha Iingkashari ha Shillong.
