Shillong, Jymmang 26 : Arngut ki shikurim kiba dei na Indore, kila jah rngai ha ka jingwan shangkai sha Meghalaya bad la iohi khatduh ia ki ha kawei ka jaka jngohkai ha ki thain Sohra.
Ia kane ka jingjah rngai jong kine ki shikurim la pyntip sha ki Pulit hadien ba ki phone jong baroh arngut kila lip sah, kaba pynkhuslai ia ka jingshngain bad ka jingim jong ki.
Kine ki shikurim ki dei u Raja Raghuvanshi ba 29 snem bad ka kurim ka Sonam Raghuvanshi. Kine ki arngut kila shim wai ia kawei ka kali arshaka ban leit shangkai sha Sohra bad la iohi khatduh ia ki ha ka sngi U Blei.
Ki Heh Pulit ki iathuh ba u hynmen jong ki ba kyrteng u Govind, ula pyntip sha ki Pulit ba kine ki arngut kila jah rngai bad ki mobile phone jong ki ruh, kila lip naduh ka miet sngi U Blei.
Ki Pulit kila sdang pynlong ia ka jingtohkit ban lapdien ia kine ki arngut. Ki Pulit kila hiar ruh ban iawad kylleng ki jaka kynthup ia ki hotel, ki homestay bad ki nongaiwai kali ban iohksai.
Kat kum ka khubor Pulit, la iathuh ba ia ka scooty ba kine ki shikurim ki shim wai, la lap na ka thain Sohra Rim.
Watla kam pat don kano kano ka jingpynthikna, ki bor Pulit ki suba jur ba kine ki shikurim ba jah rngai, ki lah ban jah na ka jingleit iaid kai sha ki jaka riat jong ka thain khlem da don ia ki nongialam lynti.
Lah ban kdew hangne, ka Ophis u Dub Divisional Officer (Civil) Sohra, kala pynmih ia ka jingbthah ha ka 15 tatik Iaiong ba kyntu ia baroh ki nongwan shangkai sha ka thain Sohra ba kin ym leit tur shajan ki jaka riat, ki wah bad rung sha ki khlaw.
La bthah ia ki ba kin leit iaid kai tang sha ki jaka kiba shna ia ki lynti iaid, ban phong ia ki juti ki bym syntuid bad kiar na ka jingiiad kulmar sha ki jaka khlaw namar ka jingbun ka riat ka ram bad lehse ka jingdon ki mrad khlaw.
