Nongstoiñ, Jymmang 25 : Kawei ka khynnah ba dang 12 snem ka rta, haba pyni ia ka sap hynmen bad ka jingstad, kala pyllait im iala u jong u para ba dang 6 snem ka rta, uba la ngam ha kawei ka thliew painkhana jong ka Iing ki para marjan kaba dap da ka um.
Kane ka khynnah ka kyrteng ka heprit Larikordor Syiem, khun jong u Bah Diningstar Kharbani bad kong Phullinda Syiem, kiba shong ba sah ha shnong Nongrangoi (Umiap). Une u heprit ba hap hapoh ka thliew u dei u para arkmie uba la tip kyrteng u Saibanstar Syiem.
Kane ka jingjia kala jia ha ka 22 tarik Jymmang, ha ka por shiteng sngi eiei katba ki Kmie Kpa jong kine ki heprit, kiba dei ki nongrep, ki dang don sha lum ban trei iala ki kam ki jam.
Haba kylli na une u heprit ba hap ha thliew, kila iathuh ba ha katei ka sngi, ma u lem bad uwei u para arkmie uba dang kham rit ia u, kila leit sha ka Iing jong u para marjan ban leit pan kheit sohphie hynrei la ong ba ki trai kim shym la ai satia bad kumta, baroh arngut kila shu iakhar noh ia u soh ba hap sha madan. U ong ba dei ha ka por ba mut wan phai, ula kum btuit bad ka slipar kala hap sha thliew kaba dap um mar shiteng eiei.
U iathuh ba ha ka jingpyrshang ban bnoh ia kane ka slipar da u dieng, ula hap pynban ialade shapoh ka thliew. U iathuh ba une u para arkmie haba iohi ia ka hynmen ba ula mih la jah ha um, ula pyrshang ban iarap da kaba pynnoh da u siej ba un ioh snoh bad ioh tan shabar hynrei la ong ba une u siej ula dkut bad mar kumta hi, ula mareh ban leit khot ia ki hynmen ban iarap.
Ka heprit Larikordor Syiem kala mareh wut wut sha katei ka thliew bad kala ioh ban pajut na ka kti ia une u para uba ngam bad kala ioh ban patan ia u sha ryngkew bad hadien kane, kala khem ia ka met na shabar bad khniot da ka bor ia ka kpoh bad shadem ban pynmih ia ka um ba ula ioh nguid.
Da kane ka jingstad kane ka heprit, une u para ula lah ban pynhiar mynsiem bad hadie katta katne por, ula kyndit bynriew bad ialam noh ia u sha Iing.
